Balik sa bubble training ang National Athletes

ni Gerard Arce - @Sports | January 06, 2022

Ipagpapatuloy pa rin ng Philippine national athletes ang kanilang pagsasanay sa susunod na linggo sa ‘bubble training’ sa iba’t ibang pasilidad sa bansa kahit nasa Alert Level 3 ang buong NCR.

Inihayag ni Philippine Sports Commission (PSC) commissioner at 31st Southeast Asian Games Chef De Mission Ramon Fernandez na hindi mababago ang orihinal na plano ng national athletes at coaches sa pagsasanay simula Enero 10 bilang preparasyon sa Hanoi meet sa Mayo 12-23, gayundin ang 19th Asian Games sa Hangzhou, China sa Set. 10-25. “We’re still looking to continue on our original plan to have our athletes training and preparation next week. Though it will be under a bubble training set-up,” pahayag ni Fernandez sa mensahe nito sa Bulgar Sports.

Nakatakda ang bubble training sa Rizal Memorial Sports Complex sa Maynila, Philsports Complex sa Pasig City at Indoor Sports Complex at Athletic Bowl sa Baguio City.

Mananatili aniya ang training ng Karate at Boxing sa Baguio City, habang hinahati pa ang lugar ng combat sports na judo, sambo, taekwondo, boxing, kickboxing at muay sa mga nalalabing sports facility, samantalang inaayos pa ni PSC National Training Director Marc Velasco ang iba pang bubble venue.

Nakasaad sa alituntunin ng DOH-IATF na bawal ang ‘contact sports’ sa bansa, maliban sa bubble set up. Inatasan din ng PSC ang pagkakaroon ng Technical Working Group na mangangasiwa sa sports na maaaring ipasok sa mga napiling pasilidad, habang ang mga national sports association (NSAs) ay dapat magsumite ng health and safety protocols na aprubado ng PSC Medical Unit.

Mahigpit ding ipatutupad ang “No vaccine, No Entry policy" sa lahat ng training facility at area habang nasa pagsasanay.