Bahagi ng Roxas Boulevard, sarado simula Enero 15

ni Lolet Abania | January 15, 2022

Isinara ang bahagi ng southbound lane ng Roxas Boulevard sa mga motorista simula alas-6:00 ng umaga ngayong Sabado, Enero 15, 2022.

Ito ay dahil sa gagawing repairs ng box culvert sa nasabing lugar.

Ang apektadong bahagi ng kalsada ay mula sa lugar sa harap ng HK Sun Plaza sa Pasay City habang magtatapos ito sa EDSA-Roxas Boulevard flyover.

Ayon sa Metropolitan Manila Development Authority (MMDA) nitong Miyerkules, nasa harapan ng Libertad Pumping Station sa Pasay City ang naturang damaged box culvert.

Batay sa Department of Public Works and Highways (DPWH), ang pagsasara at mga repairs sa lugar ay aabutin ng 60 araw.

Paliwanag ni DPWH South Manila district engineer Mikunug Macud, ang box culvert ay itinayo noon pang 1970 at kinakailangan nang i-repair dahil sa mahigit 50 taon na itong ginagamit.

Payo naman ng MMDA sa mga apektadong motorista na gamitin na lamang ang mga sumusunod na alternatibong ruta. Para sa light vehicles:

• Mula Bonifacio Drive/Roxas Boulevard: take Roxas Blvd.-Buendia Avenue service road, turn right sa Buendia Avenue Extension then left sa Diosdado Macapagal Boulevard patungo sa destinasyon.

• Mula Bonifacio Drive/Roxas Boulevard: turn right sa HK Sun Plaza access road then left sa Diosdado Macapagal Boulevard sa destinasyon.

• Mula Bonifacio Drive/Roxas Boulevard: left sa Pres. Quirino Avenue sa destinasyon.

Para sa trucks/trailers at iba pang sasakyan mula Bonifacio Drive patungong Roxas Boulevard southbound:

• Turn left sa P. Burgos Avenue, straight towards Finance Road at Ayala Boulevard, then right sa San Marcelino Street, take P. Quirino Avenue sa South Luzon Expressway patungo sa destinasyon.

Ayon pa sa MMDA, tinatayang nasa 887 cargo trucks at 1,029 trailers, araw-araw ang dumaraan sa Roxas Boulevard southbound direction.