Sakay ang MMDA official, dumaan sa busway, plaka fake, may blinker, wang-wang, etc... Drayber ni Torre, binawian ng lisensya

ni BRT @News | September 8, 2026

Photo:LTO

Pormal nang ni-revoke o binawi ng Land Transportation Office ang lisensya ng driver ni Metropolitan Manila Development Authority (MMDA) General Manager Nicolas Torre III na nahuling dumaan sa EDSA Busway.

Lumabas sa pagsusuri ng ahensya na sangkot ang driver sa ilan pang paglabag tulad ng paggamit ng plakang nakatalaga sa ibang sasakyan at pagkakabit ng ‘di awtorisadong kagamitan at marka.

Nananatiling naka-impound sa LTO Central Office ang nabanggit na sasakyan. 

Una nang inamin ni Torre na sakay siya ng SUV nang mangyari ang insidente at sinabi niyang siya ang may-ari ng sasakyan. 

Ayon sa mga ulat, isa itong armored vehicle na nabili niya sa halagang P3.5 milyon mula sa isang religious organization. Sinabi rin niyang binili niya ito sa marketplace.

Nalubog, nabalahaw, naipit sa baha... Libreng towing, extended — MMDA

ni Gina Pleñago @News | August 19, 2026

Photo: MMDA

In-extend ng Metropolitan Manila Development Authority (MMDA)  ang libreng towing services sa mga nalubog, nabalahaw, naipit sa baha hanggang sa Biyernes, Agosto 21.

Nasa siyam na ang natulungan ng ahensiya, sa pangunguna ng Special Operations Group-Task Force Road Clearing (SOG-TFRC). 

Dinala ang mga sasakyan sa bahay o repair shop na nasa Metro Manila, depende sa hiling ng may-ari.

Basura, nagpabaha sa Metro Manila — MMDA

ni Mylene Alfonso @News | August 11, 2026

Photo: MMDA

Isinisi ng Metro Manila Development Authority (MMDA) ang pagbaha sa ilang lugar sa Metro Manila sa kawalan umano ng disiplina ng ilang residente sa pagtatapon ng basura na nagdudulot ng pagbabara sa mga drainage at waterways.

“Ang nagiging problema po namin ay iyong kawalan ng disiplina ng ilan nating mga kababayan na diretso pong nagtatapon sa waterways, sa drainage, sinisingit po iyong mga basura na siya pong nagiging sanhi ng pagbabara at flash flood,” pahayag ni MMDA Chairman Romando Artes sa Palace briefing.

Nakipagkasundo na aniya, ang Metro Manila Council (MMC) na taasan ang penalty sa ilegal na pagtatapon ng basura upang matugunan ang pagbabara sa mga waterways at drainage na nagdudulot ng flash flood.

Ayon kay Artes, maayos naman ang paghakot ng basura ng mga lokal na pamahalaan at walang naitatalang malaking akumulasyon ng basura sa mga kalsada.

Ang problema, aniya, ay ang ilang residente na patuloy na nagtatapon ng basura sa waterways at drainage.

Sinabi ni Artes na gumagamit din ang MMDA ng CCTV upang matukoy ang mga lumalabag at mapatawan ng multa.

“Ang problema po natin, maraming bahay po na nakadikit d’yan na kalimitan po ay tinatapon lang basta sa likod-bahay nila.”

Ayon pa sa MMDA chief, nakikipagtulungan ang ahensya sa mga LGU upang matugunan ang problema, bagama’t aminado siyang mahirap bantayan ang napakaraming waterways sa Metro Manila.