Bagsak na mga linya ng kuryente, agad sanang aksyunan

ni Leonida Sison @Boses | November 11, 2025

Mahirap talagang bumangon gayundin ang kumilos kapag walang makita o nangangapa tayo sa dilim. Kaya dapat ay maibalik na ang liwanag sa bawat tahanan at mapabilis pa nang husto ang pagtugon ng gobyerno sa mga sakuna. 

Habang humihina na ang Super Typhoon Uwan na nasa West Philippine Sea, patuloy namang binubuhay ng National Grid Corporation of the Philippines (NGCP) ang mga linya ng kuryente sa Luzon na binulabog ng malalakas na hangin at ulan. Ayon sa ulat nitong Lunes ng umaga, siyam na transmission lines ang naibalik na ang operasyon, ngunit halos 50 ang nananatiling bagsak at nangangailangan ng agarang pagkilos. 

Kabilang sa mga naibalik ang mga linya sa Batangas, La Trinidad, at Santiago — mga lugar na unti-unting nagkaroon muli ng liwanag matapos na walang kuryente. Ilan sa mga ito ay ang Batangas-Bauan at Batangas-Taysan 69kV Lines na konektado sa MERALCO at BATELEC II, gayundin ang La Trinidad-Lamut at Sablan Lines ng BENECO. 

Ngunit sa likod ng mga naibalik na linya ng kuryente, blackout pa rin ang malaking bahagi ng Luzon — mula Quezon hanggang Albay, Nueva Ecija, Pangasinan, Benguet, at Sorsogon. 

Apektado rin maging ang ilang bahagi ng Visayas tulad ng Samar at Northern Samar, kung saan patuloy ang pagkumpuni ng Paranas-Quinapondan at Palanas Cara-Catarman-Allen-Lao-ang 69kV Lines. 

Sa kabuuan, nananatiling hindi gumagana ang 2 linya sa 138kV, 8 sa 230kV, 2 sa 350kV, at 1 sa 500kV transmission level.

Bagaman abala ang NGCP sa pagde-deploy ng mga line crew at simultaneous restoration activities, hindi maikakaila na sa bawat patay na poste ay may kabahayang umaasang muling sisindi ang ilaw bago sumapit ang gabi. 

Kung tutuusin, ang mabilis na aksyon ng NGCP ay patunay ng dedikasyon ng mga lineman at iba pang kahalintulad nitong mga manggagawa. 

Gayunman, ipinapakita ng sitwasyong ito kung gaano kahina ang ating power infrastructure sa pagharap dito at matapos ang kalamidad. 

Paulit-ulit na lang na kada bagyo, nagiging paralisado ang mga komunidad — madilim, walang signal, at walang kasiguruhan kung kailan muling babalik sa normal ang lahat. 

Sa panahon ng krisis, maituturing na kuryente ang buhay ng bayan. Kaya’t nararapat lang na magtuluy-tuloy ang pamahalaan sa pagpapatibay ng power grid, transmission lines at paglalaan ng sapat na pondo sa preventive maintenance, hindi lang sa emergency response. 

Ang tunay na sukatan ng katatagan ay hindi kung gaano kabilis bumalik sa ayos at normal, kundi kung gaano kahanda ang sistema bago pa man tumama ang sakuna. 

Kung nais nating maiwasan ang paulit-ulit na blackout, panahon na para seryosohin ng gobyerno at pribadong sektor ang modernisasyon ng energy infrastructure, mula sa mas matibay na transmission lines hanggang sa renewable energy backup systems. Dahil dito, hindi lang linya ng kuryente ang magpapailaw sa mga tahanan, pati ang pag-asa ng sambayanang Pinoy.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com