Babala sa mga gustong bumili ng lupa!

ni Atty. Persida Rueda-Acosta - @Magtanong Kay Attorney | September 7, 2022

Dear Chief Acosta,

May balak akong bilhin na lote, subalit nang nakuha ko ang orihinal na kopya ng titulo nito, nakita ko na may nakatala o naka-annotate sa likod nito. Ayon dito, ang lote ay inaangkin ng ibang tao at may nakabinbin na kaso sa Regional Trial Court (RTC) hinggil dito. Ano ba ang epekto ng annotation sa lote na aking balak bilhin? - Alpha

Dear Alpha,

Nabanggit mo na may annotation sa likod ng titulo ng lote na may kaugnayan sa kaso sa hukuman. Dahil dito, aming ipinagpapalagay na ang annotation na ito ay notice of lis pendens. Ayon sa Section 14, Rule 13 ng Rules of Court:

“Section 14. Notice of lis pendens. — In an action affecting the title or the right of possession of real property, the plaintiff and the defendant, when affirmative relief is claimed in his answer, may record in the office of the registry of deeds of the province in which the property is situated notice of the pendency of the action. Said notice shall contain the names of the parties and the object of the action or defense, and a description of the property in that province affected thereby. Only from the time of filing such notice for record shall a purchaser, or encumbrancer of the property affected thereby, be deemed to have constructive notice of the pendency of the action, and only of its pendency against the parties designated by their real names.

The notice of lis pendens hereinabove mentioned may be cancelled only upon order of the court, after proper showing that the notice is for the purpose of molesting the adverse party, or that it is not necessary to protect the rights of the rights of the party who caused it to be recorded.” (Binigyang-diin)

Ang notice of lis pendens ay isang tala sa titulo ng ari-arian, kung saan ang pagmamay-ari o anumang karapatan dito ay paksa ng isang kaso sa korte. Maaari itong ipatala ng nagrereklamo o ng inirereklamo sa registry of deeds na nakakasakop sa lugar, kung saan matatagpuan ang ari-arian. Ang nasabing notice of lis pendens ay isang paunawa sa sinumang bibili o magkakaron ng interest sa lupa.

Samakatuwid, ang notice of lis pendens ay nagsisilbing babala sa lahat ng tao na may nakabinbin na kaso tungkol sa isang ari-arian, tulad ng lupa at anumang magiging desisyon ng hukuman tungkol dito ay sasaklaw hindi lamang sa mga direktang partido sa kaso kung hindi pati sa ibang tao, kabilang na ang nakabili sa ari-arian.

Sa iyong sitwasyon, dahil may notice of lis pendens na nakatala sa titulo ng lote na iyong planong bilhin, itinuturing ng batas na ikaw ay nabigyan ng sapat na babala tungkol sa kasong kinasasangkutan nito bago mo pa man ito mabili. Dahil dito, kung sakaling itutuloy mo ang pagbili sa nasabing lote, masasakop at maaapektuhan ka ng anumang magiging desisyon ng korte hinggil sa kaso, ito man ay pabor sa iyo o hindi.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.