Angels 9th place, Chargers 10th, 11th ang Foton sa PVL

ni Gerard Arce @Sports | July 21, 2023

Mga laro bukas (Sabado)

(Philsports Arena)

Classification match

9:00 n.u. – Chery Tiggo vs Choco Mucho

Semifinals

11:30 n.u. – F2 Logistics vs PLDT

4:00 n.h – Creamline vs Cignal

6:30 n.g. – Kinh Bac Bac Ninh vs Kurashiki Ablaze

Tinapos ng Petro Gazz Angels ang kampanya sa Invitational Conference sa 9th place nang takasan ang delikadong Akari Chargers, 25-19, 25-18, 20-25, 20-25, 15-7 sa 5th set kahapon sa Premier Volleyball League (PVL) classification match sa Philsports Arena sa Pasig City.

Kinapos pa-semis ang All-Filipino Cup runner-up sa komperensiya, subalit nanatiling mataas ang tingin sa huling bahagi ng season matapos patalsikin ng Choco Mucho sa huling laro ng prelims.

Naglatag ng 7 puntos at isang block kabilang ang 14 excellent sets ang 28-anyos na veteran setter na si Djanel Welch Cheng at si leading scorer Gretchel Soltones sa triple-double na 19 pts, 14 excellent receptions at 11 excellent digs. Nag-ambag si Jonah Sabete ng 15pts, Aiza Pontillas 10pts at Marian Buitre 10pts. “It’s a short of tournament, kaya test of character ito sa amin. We gave the fans what they expected, walang easy win, level up ang competition sa PVL, so everyone should step up, kase 'di na biro ang labanan, kaya we expect na mas tataas pa ang level next conference. So we need to expect more sa sarili namin kahit kulang kami,” paliwanag ni Angels coach Oliver Almadro.

Tatapusin ng Akari ang komperensya sa 10th place na nakakuha ng isang panalo sa elimination kontra Gerflor na pinagbidahan ni Christine Soyud sa 19pts, gayundin si Faith Nisperos sa 11 pts habang may 8 puntos lang si Dindin Santiago-Manabat.

Lumapag sa 11th place ang Foton Tornadoes matapos tapusin sa 12th place ang Gerflor sa iskor sa 26-24, 13-25, 25-21, 26-24 habang napunta sa last place 13th spot ang Farm Fresh Foxies.