Ang tinatawag na ethical hacking
ni PAO Chief Persida Rueda-Acosta @Magtanong Kay Attorney | October 27, 2026
Dear Chief Acosta,
Isa po akong propesyonal na information technology (IT). Inutusan ako ng isang kumpanya na subukan ang seguridad ng kanilang computer system upang malaman kung mayroon itong mga kahinaan. Gumagamit po ako ng mga pamamaraan na maaari ring gamitin ng mga hacker, ngunit ginagawa ko ito nang may pahintulot ng kumpanya at para lamang matukoy ang mga kahinaan ng kanilang sistema. Maaari po ba akong managot sa illegal access o hacking sa ilalim ng ating batas? — Zanoba
Dear Zanoba,
Ang sagot sa iyong katanungan ay maaaring matagpuan sa ating mga batas at sa mga kaugnay na desisyon ng Korte Suprema.
Sa ilalim ng Republic Act (R.A.) No. 10175, o ang Cybercrime Prevention Act of 2012, ang terminong “without right” ay tumutukoy sa aksyon na ginawa nang walang awtoridad o lampas sa ipinagkaloob na awtoridad:
“Section 3. Definition of Terms. — For purposes of this Act, the following terms are hereby defined as follows:
x x x
(h) Without right refers to either: (i) conduct undertaken without or in excess of authority; or (ii) conduct not covered by established legal defenses, excuses, court orders, justifications, or relevant principles under the law.”
Kaugnay nito, itinuturing na krimeng Illegal Access sa ilalim ng Section 4(a)(1) ng parehong batas ang sumusunod:
“Section 4. Cybercrime Offenses. — The following acts constitute the offense of cybercrime punishable under this Act:
Offenses against the confidentiality, integrity and availability of computer data and systems:
Illegal Access. – The access to the whole or any part of a computer system without right.”
Tinalakay mismo ng Korte Suprema ang sitwasyon ng mga ethical hackers sa kasong Jose Jesus M. Disini, Jr., et al. vs. The Secretary of Justice, et al., G.R. No. 203335, February 11, 2014, sa panulat ni Hon. Associate Justice Roberto A. Abad. Ipinaliwanag ng Korte na bagama't gumagamit ang ethical hackers ng mga kasangkapan at pamamaraan na maaari ring gamitin ng criminal hackers, ginagawa nila ito upang suriin ang seguridad ng system at ipaalam sa may-ari ang mga natukoy na kahinaan. Sinabi ng Korte:
“Petitioners of course fear that this section will jeopardize the work of ethical hackers, professionals who employ tools and techniques used by criminal hackers but would neither damage the target systems nor steal information. Ethical hackers evaluate the target system’s security and report back to the owners the vulnerabilities they found in it and give instructions for how these can be remedied. Ethical hackers are the equivalent of independent auditors who come into an organization to verify its bookkeeping records.
Besides, a client’s engagement of an ethical hacker requires an agreement between them as to the extent of the search, the methods to be used, and the systems to be tested. This is referred to as the ‘get out of jail free card.’ Since the ethical hacker does his job with prior permission from the client, such permission would insulate him from the coverage of Section 4(a)(1).”
Samakatuwid, hindi ipinagbabawal ng Section 4(a)(1) ng R.A. No. 10175 ang ethical hacking kung ang pag-access sa computer system ay ginawa nang may paunang pahintulot ng may-ari o kliyente, at alinsunod sa napagkasunduang saklaw, pamamaraan, at mga system na maaaring subukan. Gaya ng nilinaw ng Korte Suprema sa kasong Disini, na nabanggit sa itaas, ang naturang pahintulot ang nag-aalis sa ethical hacker sa saklaw ng illegal access.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
Comments