Andres de saya, takot sa babae… CHAVIT, NAGSALITA NA SA RELASYON DAW KINA YEN AT JILLIAN

ni Janiz Navida @Showbiz Special | October 15, 2025

Photo: FB Luis Chavit Singson_Jillian Ward_Yen Santos

Ibang klase talaga si dating Ilocos Sur Gov. Luis “Manong Chavit” Singson, ‘pag nagbuka na ng bibig, headline na ang mga hirit niya! 

Muli naming nakapanayam ang ex-politician-businessman-philanthropist sa ginanap na Kamuning Bakery Pandesal Forum kahapon dahil special guest speaker siya sa controversial pa ring flood control scam sa gobyerno.

Tulad ng una niyang panawagan sa mga kabataan at mga estudyante na magprotesta laban sa korupsiyon, muli siyang nanawagan sa mga student leaders sa iba't ibang paaralan na gumawa ng aksiyon para kalampagin ang gobyerno at mapanagot na ang mga nagnakaw sa kaban ng bayan.

Nanawagan na rin siya sa mga LGU officials tulad ng mga mayor na ikanta-isumbong na ang mga nalalaman nilang nakinabang sa flood control projects nang sa gayun ay may makasuhan at makulong na raw lalo't inip na inip na ang madlang people sa tila moro-moro lang na public hearing sa Kongreso at Senado.

Hindi rin siya nagbago sa posisyon niyang dapat nang bumaba si Pangulong Bongbong Marcos, Jr. dahil sa kahinaan daw nito sa pamamalakad sa bansa.

Pero bukod sa mga usaping-pampulitika, hindi rin nakalusot si Manong Chavit sa mga isyung-showbiz (sabi nga niya, pang-Marites lang, haha!) na ikinakabit sa kanyang pangalan.

Isa na nga rito ay ang blind item na pagkaka-link niya sa Kapuso actress na si Jillian Ward. May mga bulung-bulungan kasi sa loob ng showbiz na diumano, galing sa kanya ang mga luxury cars ni Jillian.

Hiningi namin ang reaksiyon ni Manong Chavit tungkol sa tsismis sa kanila ni Jillian.

Sagot nito, “Marites lang ‘yun.”

Ngayon lang ba niya narinig ang pag-uugnay sa kanilang dalawa romantically?

Aniya, “Naririnig ko nga. Marami nang nali-link sa akin, puro Marites.”

Itinanong uli namin sa kanya ang walang katapusang tsismis na nagkarelasyon sila ng aktres na si Yen Santos at diumano'y may anak sila.

Nang tuwiran namin itong itanong kay Manong Chavit, ang sagot lang nito, “Next question, please?” na obviously, iniwasan niyang sagutin dahil katwiran nga niya, “Hindi ako marunong magsinungaling, eh!”

Sabi namin sa kanya, nahuli na siya sa sagot niya. So, totoo ngang naging magkarelasyon sila noon ni Yen?

“Next question,” pag-uulit na sagot ni Manong Chavit.

So, follow-up question namin, “Bakit po ‘di n'yo maamin na nagkaroon kayo ng relasyon?”

Ang natatawang sagot nito dahil tila nasukol na, “No question… Next question,” kaya nagkatawanan ang media people.

Natatawa ring dagdag niya, “Sinabi ko na kanina, eh, you can ask any question except babae, takot ako d'yan, eh.”

Ang kulit din ng inyong Ateng Janiz kaya tanong namin uli, “Bakit naman po kayo takot sa babae?”

Pag-amin niya “Under de saya ako, eh” na kabaligtaran ng image niyang kinatatakutan noon sa pulitika dahil sa pagiging powerful at influential niya at kaya umanong gawin lahat ng naisin niya.

Pero sabi nga ni Manong Chavit, iba noong kabataan niya na marami silang kalokohan, at iba na rin siya ngayon — mapagmahal na nilalang na naghahanap ng mapapangasawa para may mag-alaga naman daw sa kanya.

Oh, girls alam n'yo na!!!

Anyway, isa si Manong Chavit sa mga suki ng Kamuning Bakery at gustung-gusto ang trademark na pandesal ni Sir Wilson Flores kaya nagbiro pa ang negosyante na magbi-business na rin siya ng pandesal. Hahaha!

Sa Oct. 16, 9 AM nga pala ang World Pandesal Day na taunang ginaganap sa Kamuning Bakery kung saan namimigay si Sir Wilson ng libreng pandesal sa ating mga kababayan, kaya sugod na!!! Basta bawal lang ang magulo, ha, lalo't darating din daw doon si VP Sara Duterte sa Huwebes.

Kitakits!!!

---

MUKHANG may bago nang magiging paboritong Christmas song ang mga Pinoy bukod sa mga sikat na awitin nina Jose Mari Chan (Christmas in Our Hearts), Gary Valenciano (Pasko Na Sinta Ko) at Ariel Rivera (Sana Ngayong Pasko).

May bago kasing Christmas song na ire-release ang tinaguriang The Revival King na si Jojo Mendrez titled Ngayong Pasko’y Ikaw Pa Rin under Star Music at komposisyon ng award-winning songwriter na si Jonathan Manalo. 

Talagang kina-career na ng businessman-turned singer ang pagkanta dahil ang sipag-sipag niyang mag-record ng mga bagong awitin bukod sa mga nauna na niyang nai-release na version niya ng mga songs na Magkabilang Mundo ni Jireh Lim, Somewhere in My Past ni Julie Vega, Tuyo nang Damdamin ng Apo Hiking Society, at Sana at Handog ni Florante. 

Sa Handog ay nakamit niya ang Revival Song of the Year award mula sa Star Awards for Music ng PMPC noong 2018.

Ang Ngayong Pasko’y Ikaw Pa Rin ang masasabing highlight sa career ni Jojo dahil espesyal itong isinulat ni Jonathan Manalo para sa kanya. Malaki raw kasi ang paniniwala ng magaling na composer na mabibigyang-buhay ni Jojo ang nilikhang kanta. 

Ayon sa mga nakapakinig na ng kanta ay napakaemosyonal nito, parang bumabalik ka sa mga eksenang puno ng pag-ibig at pangungulila, habang dama mo ang puso sa bawat linya ng kanyang boses. 

Kaya naman ngayon pa lang, iniintriga na siyang baka maikumpara kina Gary V. at Ariel Rivera.

Sabi ni Jojo, “Siguro, ang pagkakatulad ng kanta ay tungkol sa pangungulila sa isang minamahal at hindi ang melody o kung anupaman. Punumpuno kasi ng emosyon ang kanta tulad ng Pasko Na Sinta Ko at Sana Ngayong Pasko.”

Dagdag pa niya, “Huwag na po sana akong intrigahin. ‘Yung may nakaisip na parang ang bagong Christmas song ko raw ay parang itinulad sa kanta nina Gary at Ariel ay hindi po totoo.”

“Tinitingala ko ang dalawang OPM icons na ‘yan at mga idol ko sila,” pakli pa niya. 

Nakatakdang i-release ngayong Oktubre ang kantang Ngayong Pasko’y Ikaw Pa Rin na tiyak na magbibigay-kulay ngayong Pasko sa gitna ng mabigat na pinagdaraanan nating mga Pilipino.