Ancajas vs. Ioka, abangan

ni Gerard Arce - @Sports | November 29, 2021

Bago pumasok ang bagong taon, matinding pukpukan at sagupaan muna ang pasasabugin para sa isang unification boxing championship sa pagitan nina Filipino IBF super-flyweight champion Jerwin “Pretty Boy” Ancajas at Japanese WBO titlist Kazuto Ioka sa Disyembre 31 sa Ota-City General Gymnasium sa Tokyo, Japan.

Pormal ng maitutulak ang 115-pound unification bout para sa New Year’s Eve boxing fest para sa panibagong tunggalian sa pagitan ng Pilipinas at Japan.

Ito ang ika-10th beses na idedepensa ng 29-anyos mula Panabo, Davao del Norte ang kanyang IBF title na kanyang napagwagian noong Setyembre 3, 2016 laban kay Puerto Rican McJoe Arroyo via unanimous decision.

“This is my Dream Fight! I have waited six years for a signature fight to prove to everyone in boxing that I am one of the best 115 pounders in the world,” pahayag ni Ancajas. “I have been to Japan, sparring in the past, and love the people of Japan and the boxing fans are some of the best in the world. They respect all fighters and root for the best man to win.”

Matapos naman bitawan ng dating kampeon na si Filipino boxer Donnie “Ahas” Nietes ang WBO title, na tumalo rin kay Ioka nung bisperas ng bagong taon nung 2018 sa Macau, naibulsa ng four-division title holder ang titulo laban kay Filipino boxer Aston Palicte via 10th round TKO sa Tokyo, Japan. Simula noon ay tatlong beses na niton matagumpay na nadepensahan ang korona kina Jeyvier Cintron ng Puerto Rico, compatriot Kosei Tanaka at Mexican Francisco Rodriguez Jr.

Walang kakupas-kupas namang idinepensa ng Filipino southpaw ang kanyang titulo kina Mexican Jose Alfredo Rodriguez, Teiru Konoshita ng Japan, British Jamie Conlan, Israel Gonzalez ng Mexico, Filipino Jonas Sultan, Japanese Ryuichi Funai, Miguel Gonzalez ng Chile, Mexican Jonathan Javier Rodriguez at isang draw kay Alejandro Santiago ng Mexico.