Anak, bini-Bisaya kapag ayaw sumunod… JOHN LLOYD, WALANG PALAG SA PAGDIDISIPLINA NI ELLEN KAY ELIAS

ni Erlinda Rapadas @Teka Nga | July 31, 2026

Photo: IG _maria.elena.adarna

Marami ang naaliw sa kuwento ni Ellen Adarna tungkol sa anak niyang si Elias Modesto. Kapag daw pinagsasabihan niya ito at sinasaway kapag may maling ginawa, dedma at matagal sumunod. 

Sa salitang English kinakausap ni Ellen si Elias. Kapag hindi pa rin siya iniintindi at sinusunod, babanatan na niya ng salitang Bisaya in high-pitched voice.

Dito raw natataranta si Elias at agad nang susunod sa kanyang Mama Ellen. Kaya hindi puwedeng lumaking spoiled brat si Elias hangga’t nasa poder ni Adarna. Behave at disiplinado ito, lalo na kapag nagagalit na ang ina.

Magkaiba sila ni John Lloyd Cruz na chill dad ang peg kapag kasama ang anak nila. Bumabawi ang aktor sa kanyang mga pagkukulang sa anak nila ni Ellen Adarna. 

Wala namang reklamo si Lloydie sa paraan ng pagdidisiplina ni Ellen sa kanilang anak na si Elias. Alam niyang nanay pa rin ang nasusunod at nakaaalam kung ano ang makabubuti sa kanyang anak.

---

Ngayon ang 29th birthday ng Kapuso actress na si Barbie Forteza. Tulad ng kanyang naunang pahayag, wala siyang bonggang selebrasyon at hindi rin siya magta-travel abroad. Wala rin siyang date sa kanyang special day dahil loveless naman siya ngayon.

Pagkatapos nilang mag-break ni Jak Roberto ay hindi na siya nagkaroon ng bagong karelasyon. Nagpaka-busy siya sa kanyang career.

Marami siyang commitments na dapat tapusin. May serye sila ni Megastar Sharon Cuneta at may movie rin siya, ang Saving Cherry (SC). Mas gugustuhin pa ni Barbie na magkawanggawa sa halip na gumastos sa kanyang kaarawan. 

Para kay Barbie, mas fulfilling ang kanyang pagdiriwang ng kaarawan kapag ang mga bata sa ampunan ang kanyang kasama. Ilang taon na niya itong ginagawa. 

Ngayon, sa mismong kaarawan niya ay tanging ang kanyang pamilya ang kanyang kasama para sa isang dinner treat. 

At this point of her life, hindi prayoridad ni Barbie Forteza ang kanyang love life. Darating ang kanyang ‘the one’ sa panahong itinakda.

---

MARAMI sa mga viewers ng The Master Cutter (TMC) ang sobrang naantig at naiyak sa eksena ni Ketchup Eusebio nang malaman niyang namatay na ang kapatid niyang si Tonet (Shuvee Etrata). Grabe ang iyak nito at hindi niya matanggap ang nangyari sa kanyang kapatid.

Mahirap ang eksenang iyon ni Ketchup. Komedyante siya at hindi mo aakalain na puwede rin pala siyang magdrama. Ramdam na ramdam ang kanyang matinding emosyon. Maging ang kanyang mga co-stars sa serye ay nagulat sa akting na ipinakita ng aktor. Tunay namang nakakaiyak ang kanyang mga eksena.

Maging ang child star na si Sienna Stevens (Ibyang) ay grabe rin ang iyak nang malamang patay na ang kanyang Ate Tonet. Awang-awa ang mga viewers kay Ibyang sa kanyang crying scenes.

Samantala, pinuri ni Dingdong Dantes si Shuvee dahil nagmarka ang kanyang character sa TMC. Kahit baguhan pa lamang ay nagpakita na si Shuvee ng husay sa pag-arte at nakakasabay sa mga datihang artista. 

Sobrang na-appreciate ng aktres ang papuri sa kanya ni Dong at flattered siya sa magagandang reviews sa kanyang pagkakaganap bilang si Tonet.

---

IBINAHAGI ni Leandro Baldemor sa panayam sa kanya ni Julius Babao ang hindi niya ikinahiyang karanasan na magtrabaho bilang isang host sa Japan nang lumamig ang kanyang showbiz career noon.

Three years siyang namalagi sa Japan bago bumalik sa ‘Pinas upang asikasuhin ang kanilang family business, ang wood carving.

May 4 hectares sina Leandro sa Paete, Laguna. Meron silang events place na may swimming pool, at meron din silang handicraft workshop para sa kanilang carvings.

Mahusay na wood carver ang aktor, namana niya ito sa kanyang pamilya. Karamihan sa kanyang mga gawa ay mga santo. Mga pari ang nag-o-order nito na galing pa sa iba’t ibang lalawigan.

‘Yun nga lang, nang subukan ni Leandro na bumalik sa showbiz, nakaranas siya ng hindi magandang treatment. Para na lang daw siyang extra kung tratuhin sa set. Wala rin siyang standby area habang hindi pa kinukunan ang kanyang eksena.

Kaya laging pasasalamat niya kay Randy Santiago na nakasama niya sa movie. Niyaya raw siya nito sa kanyang tent upang doon magpahinga. Si Randy din ang nagsabi sa buong production staff ng movie na si Leandro ay dating nagbida na sa mga pelikula ng Seiko Films, kaya dapat siyang tratuhin nang maayos.