Alvarez, undisputed super middleweight na vs. Plant

ni Gerard Arce - @Sports | November 8, 2021

Hinirang bilang kauna-unahang undisputed super-middleweight champion si Mexican superstar boxer Saul “Canelo” Alvarez matapos pabagsakin ang natitirang ibang kampeon ng kanyang dibisyon na si Caleb “Sweethands” Plant sa 11th round TKO victory para kumpletuhin ang lahat ng titulo sa unified 168-pound division kahapon sa MGM Grand Garden Arena sa Las Vegas, Nevada.

Dalawang beses munang pinatumba ng 31-anyos pound-for-pound boxer ang American boxer sa 11th round hanggang sa tapusin niya sa nalalabing 35 segundo para mapagwagian rin ang IBF title ni plant at madepensahan ang WBA (super), WBC, WBO at The Ring middleweight championship sa harap ng 16,586 na nanood ng live.

“It hasn't been easy to get to this point. With your support, my family and my team, we got very far. This is for everybody, especially for Mexico,” pahayag ni Alvarez. “I have respect for Caleb Plant. He is a very difficult fighter and has a lot of ability. I definitely respect him.”

Matapos mapanalunan ang WBA (regular) title kay Rocky Felding noong Dis. 2018 via 3rd round TKO, sunod na inagaw nito ang WBA (super), The Ring at bakanteng WBC title kay Callum Smith sa 12 round UD noong Dis. 2020 sa Texas. Idinagdag pa ang WBO title mula kay Billy Joe Saunders noong Mayo 2021 at pang-finale na si Plant para sa undisputed title at record na 57-1-2 at 39 knockouts.

Naging ika-6 na unified champion si Alvarez sa kahit anong dibisyon sa panahon ng may four-belt era. Kabilang na siya sa listahan nina retired middleweights Bernard Hopkins at Jermain Taylor, dating undisputed junior welterweight champ at WBO welterweight titlist Terence “Bud” Crawford, dating undisputed cruiserweight champ Oleksandr Usyk at undisputed junior welterweight champ Josh Taylor.