ALICE, GUMANAP NA IMELDA MARCOS, INAYAWAN NG FANS

ni Nitz Miralles @Bida | March 31, 2023

May mga followers si Alice Dixson sa Instagram na nag-unfollow sa kanya dahil ipinost niya ang photo nila ni ER Ejercito at ang poster ng pelikulang Loyalista.

Ang dalawa ang gumaganap sa role nina former President Ferdinand Marcos at former First Lady Imelda Marcos sa nasabing pelikula na ang complete title ay Loyalista (The Untold Story of Imelda Papin).

Sabi ni Alice, “One of the most interesting characters I’ve ever portrayed. Thank you Ate Mel for trusting me to play such an important role in your life & history, I love you.”

Ipinost din ni Alice na ang Loyalista ay tungkol sa last three years ng buhay ni President Ferdinand Edralin Marcos (Malacañang to Makiki, Hawaii - 1986 to 1989.)

Nakalagay din na si Gary Estrada ang gaganap na ex-husband ni Imelda Papin at si Claudine Barretto naman ang gaganap na young Imelda Papin. Introducing din sa movie ang anak ni Imelda na si Maffi Papin.

Kung may mga nag-congratulate kay Alice, may mga nag-unfollow din sa kanya dahil sa pagtanggap sa role.

Kesyo solid fan siya ni Alice, pero nadismaya dahil gaganap ito bilang si Mrs. Marcos.

May nag-comment pa nga na kaya niya in-unfollow si Alice ay dahil loyalist at wala raw pagmamahal sa Pilipinas.

Pero, mas marami ang nakaintindi na artista lang si Alice at kung may magandang role na dumating at wala naman siyang naapakan, bakit hindi tanggapin.

Hindi na sinagot ni Alice ang mga negative comments sa pagtanggap niya sa role bilang si Mrs. Marcos.

Wala pang binanggit na play date ang movie na Loyalista (The Untold Story of Imelda Papin) produced by Queenstar Film Production at directed by Gabby Ramos.