Alas Men pinahiya ang SoKor sa Invitationals

ni Anthony E. Servinio @Sports | June 11, 2025

Photo: ALAS PILIPINAS INVITATIONAL VOLLEYBALLS / ALAS PILIPINAS VS KOREA HYUNDAI Gigil na tumodo ng pag atake si Alas Pilipinas center Mark Jesus Espejo na hindi alintana ang depensa ng tatlong katunggaling Korea Hyundai sa kasagsagan ng kanilang aksyong sa ginaganap na Alas Pilipinas Invitational Volleyball sa Araneta Coliseum. via Reymundo Nillama

Humataw ang Alas Pilipinas sa kanilang ikalawang sunod na tagumpay laban sa bisitang Hyundai Capital Skywalkers ng Timog Korea sa apat na set Miyerkules sa Araneta Coliseum. Dumaan sa apat na set – 25-22, 22-25, 25-21 at 25-20.

Lumutang ang kakaibang husay ni kapitan Marck Espejo na may 20 puntos mula 17 atake. Sa gitna ng dominasyon ni Espejo ay nag-ambag ng siyam si Peng Taguibolos habang tig-pito sina Steven Rotter at Leo Ordiales.

Nagpakitang-gilas din ang bagong tuklas na si Jackson Reed na naglaro sa University of Southern California sa Amerika. Ang kanyang lolo ay tubong Pangasinan.

Si Lee Seung Jun ang nagdala ang laban para sa mga Koreano na may 18 habang 14 si Lee Jae Hyun. May siyam na puntos si Kim Jin Yeong.

Tatapusin ng Alas ang kanilang kalendaryo sa pagharap sa Thailand. Walang kokoronahan na kampeon at ang mga laro ay bilang paghahanda para pagiging punong-abala sa 2025 FIVB Men’s World Championship sa Setyembre.   

Pagkatapos ng Alas Invitationals ay sasabak ang mga Pinoy sa 2025 AVC Men’s Volleyball Nations Cup. Ang torneo ay ngayong Hunyo 17 hanggang 24 sa Manama, Bahrain.