Alamin: Work pool sa kompanya

ni Atty. Persida Rueda-Acosta - @Magtanong Kay Attorney | October 4, 2022

Dear Chief Acosta,

Ang aking kapatid ay construction worker na naglilingkod sa grupo ng mga kompanya. Bagama’t magkakaibang kompanya, naging kaugalian na ng mga ito ang maghiraman, hindi lamang ng kagamitan, ngunit pati ng kanilang manggagawa. Kapag natapos ang proyekto sa isang kompanya ay inililipat sila sa kabilang kompanya kung saan sila ay susunod na maglilingkod. Nitong nakaraan ay bigla na lamang silang pinapipirma ng “Project Employment Contract.”

Ayon sa kanilang amo, ito ay pormalidad lang diumano upang maipakita sa kanilang auditor. Hindi pumayag na pumirma ang aking kapatid kaya siya ay sinabihang huwag bumalik sa trabaho at tapos na diumano ang kanyang proyekto. Higit limang taon na siyang naglilingkod sa kompanya. Hindi ba dapat regular na siya? - Mira

Dear Mira,

Ang iyong katanungan ay sinagot ng Korte Suprema sa kaso ng Tomas Lao Construction, LVM Construction Corp., Thomas and James Developer (Phil.) Inc. v. NLRC, Mario O. Labendia, Sr., et al., G.R. No. 116781, Sept. 5, 1997, na isinulat ni Kagalang-galang na Dating Mahistrado Josue N. Belosillo, kung saan binigyang-kahulugan ng Korte Suprema ang work pool at kung ano ang epekto nito sa project o regular employee. Ayon sa Korte Suprema:

“The denial by petitioners of the existence of a work pool in the company because their projects were not continuous is amply belied by petitioners themselves who admit that —

All the employees of either of the three petitioners were actually assigned to a particular project to remain in said project until the completion or termination of that project. However, after the completion of that particular project or when their services are no longer needed in the project or particular phase of the project where they were assigned, they were transferred and rehired in another on-going project.

A work pool may exist although the workers in the pool do not receive salaries and are free to seek other employment during temporary breaks in the business, provided that the worker shall be available when called to report for a project. Although primarily applicable to regular seasonal workers, this set-up can likewise be applied to project workers insofar as the effect of temporary cessation of work is concerned. This is beneficial to both the employer and employee for it prevents the unjust situation of "coddling labor at the expense of capital" and at the same time enables the workers to attain the status of regular employees. Clearly, the continuous rehiring of the same set of employees within the framework of the Lao Group of Companies is strongly indicative that private respondents were an integral part of a work pool from which petitioners drew its workers for its various projects. xxx

We agree with the NLRC that the execution of the project employment contracts was "farcical." Obviously, the contracts were a scheme of petitioners to prevent respondents' from being considered as regular employees. It imposed time frames into an otherwise flexible employment period of private respondents some of whom were employed as far back as 1969. Clearly, here was an attempt to circumvent labor laws on tenurial security.” (Emphasis Ours)

Sang-ayon sa nasabing desisyon, ang work pool ay koleksyon o grupo ng mga manggagawa na kinukuhanan ng serbisyo ng kompanya para sa mga proyekto nito. Ang manggagawa ay maaaring ikonsiderang bahagi ng work pool kahit siya ay hindi tumatanggap ng sahod at maaaring maghanap ng ibang pagkakakitaan kapag wala pang trabahong ibinibigay sa kanya, basta makakapag-report siya sa trabaho kung siya ay ipatawag na. Ang paglipat-lipat sa mangagawa sa iba’t ibang proyekto nang magkakasunod at walang tiyak na hangganan ay nagpapakita na bahagi siya ng work pool at hindi ordinaryong project employee. Dahil dito siya ay maaaring ikonsidera bilang regular employee.

Base sa mga nabanggit, maaaring ituring na regular employee ang iyong kapatid na bahagi ng work pool kung mapatutunayang siya ay paulit-ulit na kinukuha ng grupo ng kompanyang kanyang pinapasukan at ang bawat pagkuha sa kanya ay walang tiyak na hangganan o hindi tukoy ang panahon ng pagtatapos ng kanyang pamamasukan. Makatutulong sa kanyang sitwasyon ang biglaang pagpapapirma sa kanya ng project employment contract dahil indikasyon ito na ang kasunduan niya sa kanyang mga employer tungkol sa haba ng pamamasukan ay flexible o walang tiyak na hangganan.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.