Aktres, praning daw sa COVID-19… ANGEL AT NEIL, WALANG VALENTINE DATE

ni Vinia Vivar - @Frankly Speaking | February 14, 2021

Wala raw Valentine date ngayon ang engaged couple na sina Angel Locsin at Neil Arce dahil bukod nga sa pandemic, hindi raw talaga sila sumasabay sa pagdiriwang ng Feb. 14.

Nag-guest ang dalawa sa Sakto ng TeleRadyo last Friday at natanong nga ni Amy Perez kung ano ang kanilang Valentine plans.

“Actually, every year, halos hindi kami masyadong nagse-celebrate ng Valentine's,” sey ni Neil.

"Medyo hindi kami traditional type of ‘yung mga couple kasi talaga," dagdag naman ni Angel.

“Pero we make sure magde-date kami, maybe before or after para hindi sabay sa rush,” ani Neil.

Dagdag pa ng businessman/movie producer, actually ay takot daw si Angel lumabas talaga.

“Actually, may revelation ako rito, kahit si Angel, nakikita n'yo sa labas, palagi sa mga ospital, ganu'n, takot siyang lumabas. Takot pa siya," sey ni Neil.

"Hindi pa ako puma-party-party. Kapag kailangan lang ako lumabas, lumalabas ako. Pero as much as possible, eh, hindi talaga. Kahit anong parties, wala pa akong na-attend-an simula noong pandemic. Medyo praning pa ako," segunda naman ni Angel.

"So I think sa Valentine's, medyo pandemic Valentine," ani Neil.