Aktres, piniktyuran, ikinalat pa sa socmed… DOLLY: WALANG MASAMA SA PAGBE-VAPE NI KATHRYN

ni Beth Gelena @Bulgary Files | August 6, 2023

Dinepensahan ni Dolly de Leon si Kathryn Bernardo sa kontrobersiyal na pagbe-vape nito na nakunan ng video ng isang netizen.

Paliwanag ng beteranang aktres, may eksena raw talaga si Kath na kailangan niyang mag-vape kaya nagpapraktis daw ito.

Ani ng Pinay international actress, “Dahil meron po siyang eksena na magbe-vape po talaga siya.

At may eksena rin ako na magsisigarilyo ako. Kaya pinapraktis niya kung paano gamitin ‘yung vape. ‘Yun po ‘yung nangyari talaga ru’n.”

Ipinaalala pa niya na maituturing umanong bawal ang ginawa ng netizen na pagkuha ng video para mai-post online.

“Unfortunately, spoiler, dahil nga po may tao ru’n. Actually, bawal po ‘yun, eh. ‘Yung mga nagpi-picture habang nagsu-shoot, bawal po talaga. Kung gusto nilang mag-picture, sana, hindi na lang nila ipinost.”

Kung gumagamit nga nito ang aktres sa totoong buhay, wala raw siyang nakikitang masama dahil nasa wastong edad na ang aktres.

Sina Dolly at Kath ay bibida sa pelikulang A Very Good Girl na ipapalabas na sa September in theaters nationwide.