AFAD handa sa 3rd leg ng Gun and Sporting Arm Show

by MC @Sports News | November 5, 2026

Photo: Pangungunahan nina AFAD President Aric Topacio (gitna) at practical shooter Grace Tan (kaliwa) maging ng mga miyembro ng ARMSCOR ang idaraos na ika-32 Defense and Sporting Arms Show sa Nob.  18–22 sa Megatrade Hall sa Mandaluyong City. (MC)

Nakatakdang  idaos ng Association of Firearms and Ammunition Dealers of the Philippines (AFAD) ang ikatlong bahagi ng ika-32 Defense and Sporting Arms Show sa Nob.  18–22 sa Megatrade Hall ng SM Megamall sa Mandaluyong City. 

Layunin ng pagtitipon na pag-isahin ang mga stakeholder sa industriya upang isulong ang responsableng pagmamay-ari ng baril, mahigpit na pagsunod sa mga regulasyon, at kampanya laban sa ilegal na mga baril.

Ayon kay AFAD President Aric Topacio, nananatiling nakatuon ang asosasyon sa pagtataguyod ng isang responsable, sumusunod sa batas at maayos na kinokontrol na industriya ng baril, kasabay ng pagsuporta sa mga pagsisikap ng pamahalaan na pigilan ang paglaganap ng mga ilegal na armas.

Nagpadala na ang AFAD ng mga imbitasyon sa mga opisyal ng Philippine National Police (PNP), Department of the Interior and Local Government (DILG) upang mapatatag ang kooperasyon ng pampubliko at pribadong sektor.

“Ang responsableng pagmamay-ari ng baril ay hindi lamang nangangahulugan ng pagkakaroon nito. Kabilang dito ang pag-unawa at pagsunod sa batas, pagtiyak sa wastong pag-iimbak at paghawak ng baril, at pagkilala sa responsibilidad na kaakibat ng pagmamay-ari nito,” ani Topacio.

Bukod sa adbokasiya nito para sa responsableng pagmamay-ari ng baril, hangad din ng AFAD na makipagtulungan sa mga kinauukulang ahensiya ng pamahalaan at mga awtoridad sa palakasan upang matulungan ang mga atletang Pilipino sa shooting na mapahusay ang kanilang kakayahan at makipagsabayan sa pandaigdigang kompetisyon.