86 na ilegal na baril, nasamsam

ni Gina Plenago @News | October 26, 2026

Photo: PNP NCRPO

Nasabat ng National Capital Region Police Office (NCRPO) ang 86 baril habang 83 indibidwal ang naaresto sa 81 operasyong isinagawa sa buong Metro Manila mula Oktubre 15 hanggang 21.

Ayon kay NCRPO Officer-in-Charge Police Brigadier General Christopher Abrahano, patuloy na paiigtingin ang kampanya laban sa mga ilegal na baril upang maiwasan ang karahasang may kaugnayan sa armas.

Kasunod ito ng engkwentro sa Western Bicutan, Taguig City noong Oktubre 22, kung saan dalawang armadong suspek ang nasawi sa isinagawang Oplan Sita.

Inatasan ni Abrahano ang mga lokal na hepe ng pulisya na palakasin ang Oplan Bakal, Oplan Sita at police visibility sa mga lugar na mataas ang insidente ng krimen.

Isasailalim naman sa ballistic examination ang mga nakumpiskang baril habang hinikayat ang publiko na iulat ang mga indibidwal na pinaghihinalaang ilegal na nagdadala ng armas.