Lalaki, tiklo sa pagbebenta ng registered SIM cards

by Mervin Reyes @News | September 2, 2026

Photo: Lalaki huli sa pagbebenta ng regisitered SIM cards - PNP Anti Cybercrime Group.

Arestado ang isang 26-anyos na lalaki sa Obando, Bulacan dahil sa umano’y ilegal na pagbebenta ng registered SIM cards online.

Ayon sa Philippine National Police Anti-Cybercrime Group, nahuli ang suspek sa entrapment operation matapos ma-monitor ang kanyang online advertisement.

Sinabi ni PNP-ACG acting director Maj. Gen. Wilson Asueta na bumibili rin umano ang suspek ng SIM cards sa iba at may ilan ding siya mismo ang nagrerehistro.

Nag-iiba umano ang presyo depende sa paggamit at registration status. Ang regular SIM ay maaaring ibenta sa P10, registered SIM sa mahigit P100, habang ang SIM na konektado sa financial accounts ay umaabot umano sa P3,500.

Kabuuang 400 SIM cards ang nakumpiska at isasailalim sa Warrant to Disclose Computer Data at karagdagang imbestigasyon. Sinusuri rin ng pulisya ang mga posibleng paulit-ulit na bumibili ng registered SIM cards mula sa suspek.

40 Pinoy, nadale... Korean, kulong sa illegal recruitment

ni Mai Ancheta @News | May 9, 2026

Photo: PNP

Himas-rehas ang isang 54-anyos na Korean national dahil sa umano’y illegal recruitment ng mga Pilipino para magtrabaho sa South Korea kapalit ng malaking halaga.

Naaresto ng mga otoridad ang suspek na si “Hyun” habang nasa aktong tinatanggap ang placement fee sa isang aplikante sa Matina Enclaves sa Quimpo Boulevard, Davao City.

Kasama ng mga operatiba ng PNP-CIDG Davao City Field Unit ang mga kinatawan ng Department of Migrant Workers nang arestuhin ang Korean.

Nag-aalok umano si “Hyun” ng trabaho sa South Korea bilang factory worker at ang magiging sahod ay KRW 2.2 million o halos P92,000 kasama ang libreng pagkain at akomodasyon.

Pero kinakailangang magbayad umano ang mga aplikante ng P28,000 bilang processing fee, subalit nang i-verify sa DMW ay walang legal authority si “Hyun” na mag-recruit.

Tinatayang 40 aplikante  na ang nabiktima umano ng suspek sa Davao City.

Nahaharap ang suspek sa kasong illegal recruitment.

12 arestado sa tupada

ni Benjamin Chavez | February 28, 2023

Inaresto ang 12 katao na nagtutupada sa Bgy. Macabling at Bgy. Malitlit sa Sta. Rosa City, Laguna.

Sa Bgy. Macabling, 9 katao ang hinuli nang magsagawa ng operasyon laban sa ilegal na sugal ang mga operatiba ng Intel ng Sta. Rosa City Police Station.

Kinilala ang mga inaresto na sina Jhon Nieves, Jodie Molera, Joven Barcala, Roland Palamos, Ariel Silang, Carlito Esquillio, Isidro Fomanes, Joemar Sta. Teresa at Richard

Nieves.

Nakumpiska ang dalawang tari, mga manok na panabong at taya na P4,500. Tatlo naman ang naaresto sa Bgy. Malitlit, na kinilalang sina Carlito Rosario, Benjamin Ention at Ralph Jorvis Dondiego.

Nakumpiska ang dalawang panabong, tari at P1,100 na taya.