6 prexy bets, sasabak sa Comelec debates

ni Lolet Abania | March 13, 2022

Anim mula sa 10 kandidato na tatakbo sa pagka-pangulo ang nagkumpirma ng pagdalo sa Commission on Elections-sponsored debates na sisimulan na sa Marso 19, ayon kay Comelec spokesperson James Jimenez.

Nai-post ni Jimenez sa Twitter, ang listahan ng mga nagkumpirmang kandidato ng kanilang partisipasyon sa “PiliPinas Debates 2022: The Turning Point” hanggang alas-1:25 ng hapon ngayong Linggo.

Kabilang dito sina Ernesto Abella, Leody de Guzman, Isko Moreno, Norberto Gonzales, Panfilo Lacson, at Manny Pacquiao.

Inilabas naman ni Jimenez ang mga commitment forms na nai-submit na nina Lacson, Moreno, at De Guzman.

Anang opisyal, sina Faisal Mangondato, Jose Montemayor at Leni Robredo ay hindi pa nakapagbigay ng kanilang written commitment subalit nagpahayag ang mga ito na dadalo sa Comelec debates.

Si Ferdinand “Bongbong” Marcos, Jr. ay wala pang isinumiteng written at verbal commitment, o kaya’y tumanggi sa naturang debate, ayon kay Jimenez.

Nakatakdang isagawa ang unang presidential debate sa Marso 19, habang ang unang vice presidential debate ay nakaiskedyul ng Marso 20. Gaganapin ang parehong events sa Sofitel Philippine Plaza Manila sa Pasay City.

Sa Abril 3 naman, ang nakatakdang ikalawang presidential debate.

Ayon sa Comelec, “Each debate is anchored on a set of predetermined subjects on pressing concerns in the country, such as the COVID-19 pandemic and the economy, with a pool of questions gathered from concerned sector groups.”

Ang naturang debate ay mayroong tinatawag na single-moderator format, kung saan walang live audience.

Gagawin din ang isang presidential at vice presidential town hall na nakatakda sa Abril 23 at 24, batay sa pagkakasunod. Magkakaroon ang nasabing mga events ng remote at in-person audience, at isang post-debate roundtable.

Sinabi naman ng Comelec nitong Lunes, na ang mga kandidato na hindi magpa-participate sa Comelec-organized debates ay mawawalan ng kanilang slots sa e-rally platforms ng poll body hanggang sa magtapos ang campaign period.

Gayundin, ayon sa Comelec, “the absence of the candidate will be highlighted by leaving the podium designated for them empty.”