5 patay sa ‘airdrop aid’ sa Gaza
- BULGAR
- Mar 9, 2024
- 1 min read
ni Eli San Miguel - Trainee @News | March 9, 2024
Namatay ang hindi bababa sa limang tao at nasugatan ang 10 iba pa nang mahulog sa kanila ang mga 'airdrop aids' sa kampo ng Al Shati sa kanluran ng Gaza City.
Sinabi ni Khader Al Zaanoun sa CNN na nasaksihan niya ang mga aid package na bumabagsak mula sa mga sasakyang panghimpapawid sa kampo ng Al Shati noong Biyernes, ngunit hindi niya matiyak kung aling bansa ang nasa likod ng airdrop.
Kinumpirma ni Muhammad Al-Sheikh, Head of Emergency Care Department sa Al Shifa Medical Complex sa Gaza City, na limang tao ang namatay sa insidente.
Ayon kay Al-Sheikh, ilan sa mga nasugatan sa insidente at nailipat sa Al Shifa at nasa malubhang kalagayan.
Patuloy namang nagpapadala sa Gaza ng mga ‘airdrop aids’ ang United States at iba pang mga bansa.
Comments