4 pa lang ang nasa listahan, walang taga-showbiz… BONG, LITO, IPE AT WILLIE, LAGLAG SA MGA IBOBOTO NI ANNE

ni Nitz Miralles @Bida | May 9, 2025

Photo: Anne Curtis - IG

Nagpapatulong si Anne Curtis sa kanyang mga followers sa Facebook (FB) na punuin ang listahan niya ng senatoriables na kanyang iboboto sa May 12 midterm elections. 

Apat pa lang ang nasa listahan ng aktres, marami pa siyang idaragdag at kakailanganin nga niya ng tulong.

Sabi nito, “So far, my top picks for senators!!! Pero kulang pa. Kayo? Sino pa ang nasa listahan n’yo? At bakit? Would love to hear why? Need to add more to my list.”

Ang nasa listahan ni Anne ay sina Kiko Pangilinan, Bam Aquino, Luke Espiritu at Heidi Mendoza. 

Agad nagpasalamat sina Bam, Luke at Heidi kay Anne. Malaking tulong ang ginawa ng aktres na may 19 million followers sa FB. Imagine, kung lahat ng followers niya na botante ay boboto sa 4, sure winner na sila.

May nagtanong kay Anne kung bakit wala sa list niya si Senator Bong Go? May mga binanggit din ang mga followers niya na senatoriables na puwede niyang i-consider at isama sa kanyang listahan ng mga iboboto.

Napansin namin na walang taga-showbiz sa list ni Anne at siguro naman, maiintindihan siya nina Senators Bong Revilla at Lito Lapid na parehong re-electionist, pati na nina Phillip Salvador at Willie Revillame na tumatakbo ring senador. Kumbaga, walang personalan at walang rason para magtampo ang mga nabanggit.

Naintindihan din naman si Anne ng kanyang mga followers sa kanyang choice na iba sa kanilang mga iboboto. Respetuhan na lang daw ng choices.

SA Sunday na raw, May 11, ang lipad nina Barbie Forteza at Kyline Alcantara for South Korea (SK) para sa taping ng Beauty Empire (BE). For sure, may iba pa silang kasama sa cast na magsu-shoot sa nasabing bansa. 

Si Kyline, nakapunta na sa SK, pero si Barbie yata, first time kaya excited.

Sa gabi raw ang flight nina Barbie at Kyline, kaya makakatakbo pa si Barbie para sa charity run na Lights, Camera, Run Takbo Para sa Pelikulang Pilipino. 

Maagang nagpalista si Barbie na parang 10K ang tatakbuhin. Kaya na niya ang ganito kalayo dahil nakapaghanda siya.

Sayang lang at hindi nag-abot sina Barbie at Alden Richards sa SK. Naroon si Alden para sa premiere night ng Mission Impossible—The Final Reckoning (MITFR) at maganda sana kung nagkita sila. Kaya lang, baka Saturday pa lang, nakabalik na si Alden dahil siya ang in-charge sa charity run.

Samantala, inamin ni Barbie na star struck siya kay Ruffa Gutierrez na kasama nila ni Kyline sa BE. Kapag dumarating daw sa set si Ruffa, nakatingin lang siya rito.

“I’m very, very excited to work with Ms. Ruffa. Lagi akong star struck if she’s in the standby area. Ang ganda-ganda n’ya,” ang pagpa-fangirling na comment ni Barbie.

Mabuti at hindi nadi-distract si Barbie kapag magkaeksena sila ni Ruffa, lalo na at ang role nila ay opposing side. Kay Kyline kampi si Ruffa at pagtutulungan nila si Barbie.

As for Kyline, natatawang sabi ni Barbie, “It’s such a treat to work with that woman. Hindi kami nauubusan ng tsika ... at kape.”

Hindi naitanong ng reporter kung para saan ang pinag-uusapan nina Barbie at Kyline. Curious ang mga fans kung pati break-up nila sa kani-kanyang ex ay kasama sa kanilang pinag-uusapan.

MARAMI ang natuwa nang makita ang photo nina Jessica Soho at Korina Sanchez na parehong nasa Vatican ngayon at nagko-cover sa announcement ng magiging bagong Santo Papa.

Naka-post sa Instagram (IG) ni Korina ang photo nila ni Jessica at may caption na, “G? Why not? Rain and sun meet as friends at the Vatican. Just as K meets GMA7’s icon, Jessica Soho. #conclave.”

Nakakatuwa ang comment na, “Ang tunay na Jessica Sanchez,” na pati si Korina ay natawa dahil swak na swak. 

May mga requests na sana mag-collab ang dalawa at handang-handa raw ang mga netizens na suportahan anuman ang kanilang magiging project.