3rd win, lalagukin sa Farewell Tour ng Aces

ni Gerard Arce - @Sports | February 23, 2022

Tatangkain ng Alaska Aces na lagukin ang ikatlong sunod na panalo laban sa kadikitan sa tuktok ng team standings na NLEX Road Warriors habang tutunggain ng San Miguel Beer ang second straight win at makahiwalay sa katablang Phoenix Super LPG ngayong araw sa umiinit na aksyon sa elimination round ng PBA Governor’s Cup sa Ynares Center sa Antipolo City.

Pangungunahan ni PBA Player of the Week forward Jeron Teng ang Alaska Aces para sa binansagang ‘farewell tour’ ng koponan sa liga, kung saan nagpamalas ng inspiradong laro ito sa dalawang sunod na panalo para harapin ang 4th ranked na NLEX sa unang laro ng 3 p.m. Susubukang masundan ni SMB import Orlando Johnson ang 31 puntos na scoring performance kontra Brgy. Ginebra noong nagdaang Linggo, laban sa Fuel Masters sa 2nd game ng 6 p.m.

Bumira ng averages na 18.5 points ang 27-anyos na dating DLSU star sa nagdaang linggo. “Every game, we're inspired. We're doing it for the Alaska company, of course for boss Fred Uytengsu, and for all the players that played before us, the Alaska legends, the management, the coaches,” saad ni Teng na napili ng Aces bilang 5th overall pick noong 2017 PBA Rookie Draft.

Hawak ng Aces ang 5-2 kartada na nais na makalayo sa Road Warriors na may 5-3 marka at parehong nanggaling sa pagkapanalo, kung saan niligwak ng Aces ang Rain or Shine E-Painters sa 80-74 noong Peb. 17 at pagpapatirik sa Terrafirma Dyip mula sa 102-97 come-from-behind victory noong Peb. 19, habang inilampaso ng Road Warriors ang Blackwater Bossing sa 117-97 noong Peb. 18.

“The first thing on our mind right now is playing against NLEX. We’ll just do it one game at a time. We want to stay in the moment and living in the moment, pass our test and ready for our next test,” wika ni Alaska coach Jeff Cariaso.

May ulat na magpapalit ng import ang Beermen kahit impresibo ang performance ni 2013 NBA 14th overall pick mula Minnesota Timberwolves na si Shabazz Muhammad.