2 estudyanteng babae, natusta sa boarding house

by Jeff Tumbado @News | October 11, 2026

Photo: Circulated

Nasawi ang dalawang babaeng estudyante makaraang ma-trap sa nasusunog nilang boarding house sa isang residential compound sa Brgy.Nazareth, Cagayan de Oro City.

Nabatid na ang sunog ay naganap nitong umaga ng Biyernes, Oktubre 9 na tumagal ng ikatlong alarma.

Batay sa inisyal na ulat, isa sa mga nasawi ay anak mismo ng may-ari ng boarding house.

Una umanong tinawagan ng may-ari ang kanyang anak na nasa loob ng nasusunog na gusali subalit hindi na ito sumasagot sa cellphone nito.

Alas-11 ng umaga nang mailabas ang mga sunog na labi ng mga biktima.

Hindi pa tukoy ng mga awtoridad ang pinagmulan ng sunog na patuloy na iniimbestigahan pa.