Pagawaan ng paputok sumabog, 4 todas

by Mai Ancheta @News | November 6, 2026

Photo: Pagsabog sa pagawaan ng paputok sa Brgy. Tabo Sili, Malasiqui, Pangasinan - Circulated

Apat katao kabilang na ang isang pitong taong gulang na bata ang nasawi makaraang sumabog ang pagawaan ng paputok sa Brgy. Tabo Sili, Malasiqui, Pangasinan nitong Miyerkules ng gabi, November 4.

Bukod sa apat na nasawi, isa ang iniulat na nawawala sa insidente.

Batay sa inisyal na imbestigasyon, hinihinalang ilegal ang pagawaan ng paputok na nasa isang abandonadong piggery.

Sinabi ng ilang residente na bago sumiklab ang sunog ay nakarinig sila ng malakas na pagsabog, kasabay ang pagyanig sa kalapit na mga kabahayan.

Nadamay sa sunog ang isang sasakyang nakaparada malapit sa lugar.

Sunog sumiklab sa palengke, 5 natusta

by Jeff Tumbado @News | October 26, 2026

Photo: Sunog sa Sorsogon City Public Market - City Boi Adventure FB

Limang katao ang pinangangambahang nasawi sa sunog na tumupok sa Sorsogon City Public Market nitong Sabado ng gabi, Oktubre 24, habang nahihirapan ang mga emergency responders na tukuyin ang posibleng mga biktima dahil sa matinding pagkasunog ng kanilang mga labi.

Ayon kay FO1 Vanessa Fullion, radio operator ng Bureau of Fire Protection (BFP) sa Sorsogon City, pinaniniwalaang mga may-ari ng puwesto sa palengke o mga taong naroon lamang ang mga posibleng nasawi.

Gayunman, hindi pa natutukoy ang kanilang mga pagkakakilanlan habang nagpapatuloy ang imbestigasyon ng Scene of the Crime Operatives (SOCO) ng PNP.

Ayon kay Fullion, nagsimula ang sunog alas-10 hanggang alas-11 ng gabi noong Sabado.

Umabot sa ikalawang alarma ang sunog, dahilan upang rumesponde ang pitong fire truck mula sa mga karatig-bayan.

Idineklara na ganap nang naapula ang sunog alas-2 ng madaling-araw nitong Linggo.

Gayunman, nagpapatuloy pa rin ang clearing operations upang matiyak na hindi na muling magliyab ang lugar.

Patuloy pang inaalam ng mga awtoridad ang sanhi ng sunog, habang isinasagawa rin ang pagtataya sa halaga ng pinsalang iniwan nito.

111 yrs. old nagpi-piano, nakarinig ng pagsabog; bahay natupok

ni BRT @News | October 20, 2026

Photo: Sunog sa Maya Street, Barangay Phil-Am, Quezon City - CIrculated

Nasunog ang isang bahay na gawa sa kahoy sa Maya Street, Barangay Phil-Am, Quezon City, bandang alas-5 ng madaling-araw ngayong Lunes, Oktubre 19.

Nakaligtas ang may-ari ng bahay na iniulat na 111-taong-gulang na lola.

Ayon sa kanya, nagpi-piano siya nang makarinig ng pagsabog. Nang puntahan niya ang kuwarto, malaki na ang apoy, kaya agad siyang humingi ng tulong.

Wala umanong suplay ng kuryente sa bahay, ngunit may nakasinding kandila sa altar.

Ayon sa BFP, nadamay rin sa sunog ang katabing bahay. Idineklarang fire out ang insidente alas-6:07 ng umaga.

Patuloy pang iniimbestigahan ang sanhi ng sunog.