LTO-NCR, nasunog

by Jeff Tumbado @News | September 21, 2026

Photo: Phil-Chinese Golden Wild Fire&Rescue Volunteer Inc

Tinatayang nasa P30,000 halaga ang napinsalang mga kagamitan sa sumiklab na sunog sa tanggapan ng Land Transportation Office-National Capital Region (LTO-NCR) sa Araneta Avenue, Quezon City, nitong Linggo ng umaga.

Ayon sa Bureau of Fire Protection (BFP), dalawang computer at dalawang mesa ang natupok sa sunog na nagsimula alas-11:14 ng umaga sa isang opisina sa ikatlong palapag ng gusali.

Itinaas sa ikalawang alarma ang insidente bago tuluyang naapula ng mga bumbero alas-12:04 ng tanghali.

Sinabi ng BFP na kabilang sa mga tinitingnang posibleng dahilan ng sunog ang electrical

short circuit.

Hindi na kumalat ang apoy sa iba pang bahagi ng gusali.

Ayon naman kay LTO Chief Assistant Secretary Markus Lacanilao, walang mahahalagang personal records ang nasunog sa insidente.

Aniya, ang mga natupok na computer ay ginagamit para sa inventory ng distribution ng mga plaka.

Wala namang naiulat na nasawi o nasugatan dahil sarado ang tanggapan nang mangyari ang sunog nitong Linggo.

Inaasahang babalik sa normal ang operasyon ng LTO-NCR ngayong araw ng Lunes, Setyembre 21.

Patay sa nasunog na MV June Aster, 77 na

ni Mai Ancheta @News | September 17, 2026

Photo: PCG

Nasawi nitong Martes ng hapon ang isang nakaligtas sa sunog sa passenger ferry na MV June Aster matapos magtamo ng malubhang paso.

Ang biktima, na isang crew member ng barko, ay ginagamot sa Culion Sanatorium and General Hospital nang pumanaw. Hindi naman inilabas ng mga awtoridad ang kanyang pagkakakilanlan.

Dahil sa kanyang pagkamatay, umakyat sa 77 ang bilang ng mga nasawi.

Patuloy naman ang pinalawak na search and rescue operation para sa 12 pasaherong nawawala, isang linggo matapos masunog ang barko sa karagatan ng Coron, Palawan.

Patuloy din ang imbestigasyon upang matukoy ang mga pangyayaring humantong sa nakamamatay na sunog.

Iskul nasunog, 24 bata nalitson

ni Justine Berganio @Overseas News | September 12, 2026

Photo: Bukavu, Democratic Republic of the Congo. - AP

Patay ang 24 bata, kabilang ang 19 babae at limang lalaki, matapos tupukin ng malaking sunog ang dalawang paaralan at nasa 300 bahay na gawa sa kahoy sa rebel-controlled city ng Bukavu, Democratic Republic of the Congo.

Ayon sa AFC/M23 rebel administration, 29 katao ang sugatan at 21 sa mga ito ang nasa intensive care. Patuloy naman ang imbestigasyon para matukoy ang sanhi ng sunog.

Mabilis na kumalat ang apoy habang nasa paaralan ang mga bata. Rumesponde ang mga ambulansya para ilikas ang mga nasawi at sugatan, habang natupok ang maraming kabahayan.

Pagsapit ng hapon ay naapula ang sunog, pero patuloy na umaakyat ang usok mula sa mga guho. Posibleng madagdagan pa ang bilang ng mga nasawi habang nagpapatuloy ang search at assessment sa lugar.