19-anyos na Maritime student, patay sa hazing... 5 frat members, sumuko

ni Janice Baricuatro @News | March 10, 2026

Photo: Courtesy of Pulis News Network

Sumuko sa pulisya ang 5 pang suspek na sangkot umano sa naganap na hazing na ikinamatay ng isang 19-anyos na BS Maritime student, kamakalawa sa Brgy. Langkaan 1, General Trias, Cavite.

Ayon kay Philippine National Police (PNP) spokesperson Randulf Tuaño, apat ang sumuko sa General Trias, habang isa naman ang sumuko sa Dasmariñas.

Una nang nagtungo kay Police Colonel Bismark Mendoza, ang apat na suspek kasama ang kani-kanilang abogado, mga magulang, at kinatawan ng Tau Gamma Phi National Council.

Kinilala ang mga sumukong suspek sa mga alyas na John, 22, residente ng Golden Horizon, Trece Martires City, Cavite, 3rd year college; Archie, 21, ng Pasong Kawayan 2, General Trias, 3rd year college; Kenneth, 18, ng Montalban, Rizal, 1st year college; at isa pang John, 19, ng Dasmariñas City, Cavite, 1st year college, lahat ay estudyante ng PNTC.

Matatandaang noong Marso 1 nang maganap ang hazing sa Sitio Asiongan sa Brgy. Langkaan 1, Dasmariñas, Cavite kung saan sumailalim sa initiation ang biktimang si Kenneth Alceda, 19, first year BS Maritime student sa PNTC, kasama ang ilan pang neophytes.

Sa kasamaang-palad, hindi nakaligtas ang biktima matapos umano itong dumanas ng matinding pananakit at hirap sa kamay ng 17 suspek na sangkot sa hazing.