18 dedbol sa New York dahil sa matinding lamig

by Jenny Rose Albason @Overseas | February 11, 2026

Photo: Circulated / Telegrafi

Umabot na sa kabuuang 18 ang nasawi dahil sa matinding lamig sa New York City.

Mula huling bahagi ng Enero, nakaranas ang lungsod ng matinding lamig, kabilang ang 13 araw na may temperatura na 0°C (32°F) o mas mababa pa – isa sa pinakamahabang yugto ng sobrang lamig na naranasan ng New York sa nakalipas na anim na dekada.

Sa nakaraang weekend, isa pa ang namatay sa kalye ng lungsod, na nagdagdag sa bilang ng mga biktima ng lamig.

Bagamat inaasahang tataas ang temperatura ngayong linggo, nananatili pa rin itong mas mababa kaysa sa karaniwan, kaya patuloy na pinapayuhan ang mga residente na maging maingat, manatili sa loob ng bahay.