US at Australia, nagbigay ng P36B sa Pacific Islands, kontra-droga

ni Justine Berganio @Overseas News | September 3, 2026

Photo: File

Umabot sa $580 (P36B) milyon ang pinagsamang pondo ng Estados Unidos at Australia para sa mga bansang Pacific Islands, kasabay ng pagpapaigting ng dalawang bansa sa kanilang presensya at impluwensya sa rehiyon na patuloy ding inaagawan ng atensyon ng China.

Inihayag ng Australia ang $430 milyon (P26B) na package para labanan ang drug smuggling at organisadong krimen sa Pacific.

Gagamitin ang pondo sa pagpapalakas ng aerial surveillance at dagdag na training para sa mga pulis at border officials ng mga bansang kabilang sa rehiyon.

Ayon kay Australian Prime Minister Anthony Albanese, mahalaga sa Australia ang seguridad ng Pacific dahil itinuturing nila itong bahagi ng kanilang tahanan at pamilya.

Samantala, naglaan naman ang US ng $150 milyon (P9B) para sa Pacific Islands, kabilang ang $60 milyon (P3B) na tutulong sa mga bansa na harapin ang global energy crisis.

Bahagi ng naturang pondo ang pagpapalawak ng fuel storage capacity at mga hakbang para mapanatiling matatag ang kanilang power grids.

Inanunsyo ni US Deputy Secretary of State Christopher Landau ang ayuda sa ginaganap na Pacific Islands Forum sa Palau, kung saan nangingibabaw din ang usapin sa paglahok ng Taiwan.

Tutol ang China sa presensya ng Taiwan sa taunang pagpupulong ng 18-member forum dahil itinuturing ng Beijing ang Taiwan bilang bahagi ng teritoryo nito.

Sinabi naman ng Australia at New Zealand na ang bloc ang magpapasya kung sino ang maaaring imbitahan sa forum.

Ang Palau, na host ng kasalukuyang pagpupulong, ay kabilang sa tatlong Pacific nations na patuloy na nagpapanatili ng diplomatic ties sa Taiwan.

Nagsimula ang forum noong Agosto 30 at nakatakdang magtapos sa Setyembre 4.

US at Iran, malapit nang magkasundo sa pagbubukas ng Strait of Hormuz

ni Jenny Rose Albason @World News | May 29, 2026

Iniulat ng state television ng Iran na nakakuha umano ang Tehran ng draft ng isang paunang memorandum of understanding (MoU) kasama ang Estados Unidos kaugnay ng posibleng pagtatapos ng tensyon sa pagitan ng dalawang bansa.

Batay sa ulat, nakasaad sa draft framework na ibabalik ng Iran sa normal o pre-war levels ang commercial shipping sa Strait of Hormuz sa loob ng isang buwan. Kapalit nito, aalisin naman ng Estados Unidos ang mga puwersang militar nito malapit sa Iran at ititigil ang naval blockade.

Ayon sa state TV ng Iran, hindi pa pinal ang naturang framework at hindi muna kikilos ang Tehran hangga’t wala umanong “tangible verification” o konkretong katiyakan sa mga napagkasunduan.

Nakasaad din sa draft na hindi kabilang ang mga military vessel sa kasunduan at pamamahalaan ng Iran ang pagdaan ng mga barko sa Strait of Hormuz katuwang ang bansang Oman.

Dagdag pa rito, kung magkakaroon ng pinal na kasunduan sa loob ng 60 araw, maaari umano itong aprubahan bilang isang binding resolution ng United Nations Security Council.

Nabatid na ang naturang kasunduan sa pagitan ng U.S. at Iran ay bunga ng indirect talks na sinimulan matapos sumiklab ang digmaan noong Pebrero, kung saan naging pangunahing tagapamagitan ang bansang Pakistan para sa tigil-putukan.

US at Israel, joint forces sa pagwakas ng nuclear threat ng Iran

ni Jenny Rose Albason @World News | May 26, 2026

Sinabi ni Israeli Prime Minister Benjamin Netanyahu nitong Linggo na nagkasundo sila ni US President Donald Trump na anumang pinal na kasunduan sa Iran ay dapat tuluyang wakasan ang umano’y nuclear threat ng Islamic republic.

Ayon kay Netanyahu, nakausap niya si Trump noong Sabado ng gabi sa isang pag-uusap na nauna nang inilarawan ng Amerika bilang “napakaganda.”

Kabilang umano sa kanilang napagkasunduan ang pagbuwag sa uranium enrichment facilities ng Iran at ang pag-aalis ng enriched nuclear materials mula sa teritoryo nito.

Binigyang-diin din ng Israeli leader na pareho ang kanilang posisyon ni Trump na hindi dapat magkaroon ng nuclear weapons ang Iran.

Napag-usapan din umano ng dalawang lider ang memorandum of understanding kaugnay ng muling pagbubukas ng Strait of Hormuz, isang mahalagang ruta sa pandaigdigang kalakalan at suplay ng langis.

Dagdag pa ni Netanyahu, nananatiling matatag ang alyansa ng Israel at Estados Unidos, lalo na sa usapin ng seguridad at depensa laban sa mga banta sa rehiyon, kabilang na umano ang sitwasyon sa Lebanon.