15-anyos, dinala sa sementeryo... Police vlogger, kulong sa rape

by Jeff Tumbado @News | September 15, 2026

Photo: File

Arestado ang isang police vlogger matapos umanong halayin ang isang 15-anyos na babae sa loob ng pampublikong sementeryo sa Villanueva, Misamis Oriental nitong Sabado ng gabi.

Ang suspek, isang Police Staff Sergeant at vlogger ng Villanueva Municipal Police Station, ay kasalukuyang nakadetine sa Misamis Oriental Provincial Police Office.

Ayon sa pulisya, dinala umano ng suspek ang biktima sa madilim na bahagi ng sementeryo kung saan nangyari ang pang-aabuso. Nagsumbong ang biktima kinabukasan, dahilan upang arestuhin ang suspek ng kanyang mga kabaro.

Naisampa na laban sa kanya ang kasong rape sa ilalim ng Republic Act No. 8353 o Anti-Rape Law of 1997 para sa inquest proceedings.

Humingi naman ng paumanhin sa publiko si Misamis Oriental Provincial Police Office Director Police Colonel Ali Abanales, na nagsabing batay sa paunang imbestigasyon, isolated incident at personal na pagkakasala ng suspek ang insidente.