10 taong walang big concert, bumabawi… ICE, MAG-IIKOT SA 'PINAS AT SA IBANG BANSA

ni Julie Bonifacio @Winner | January 4, 2023

Pressure and excitement ang nararamdaman ng mga drag queens na sina Precious Paula Nicole, Viñas Deluxe at Brigiding, collectively known as the “Divine Divas” sa nalalapit na first major concert nila titled Divine Divas: The Ultimate Drag Experience na magaganap sa New Frontier Theater on February 10, Friday at 8 PM.

From Precious Paula Nicole, naging "Pressure Paula Nicole" na raw ang name niya dahil sa nerbiyos na napi-feel.

Tsika naman ni Brigiding, “Yes, may pressure po. Please, tulungan n’yo naman kami. Kasi gagalingan namin talaga para maging sulit po ang pagbili ninyo ng tiket. Available na po, nasa online na. And sana, monumental ito kapag naka-ano tayo for the (LGBT) community. So, thank you.”

Nakausap namin ang Divine Divas sa presscon na ipinatawag ng kanilang producers na sina Sylvia Sanchez, Liza Diño-Seguerra at Ice Seguerra sa Tipsy Bar last Friday, December 30.

Since pre-Valentine show ang Divine Divas concert, we asked them kung sinu-sino ang mga mahal nila sa buhay na nais nilang makitang nasa front seat ng New Frontier para panoorin sila.

Sagot ni Brigiding, “Siyempre, ‘yung most special people sa amin, ‘yung mga karelasyon namin.

And’yan po ‘yung boyfriend ko (sa loob ng Tipsy Bar), eh. Siyempre, ‘yung parents namin.

“I think this is one of the biggest chances na maipakita sa kanila na, ‘Heto ‘yung pinalaki n’yo.

Heto ‘yung binigyan Ninyo ng tiwala. ‘Yung sinuportahan Ninyo simula pagkabata. Hindi ninyo pinalo. Hindi ninyo pinagalitan na bakit ako bakla. Hindi ninyo ako pinagbawalang magbihis- babae, mag-make-up. And eto ako ngayon, nasa harapan Ninyo, nagpe-perform, nagpapasaya ng maraming tao.”

Say naman ni Viñas, “Ako po naman, siyempre ‘yung family ko, gusto kong makita roon sa harap.

I want to see them na talagang proud na itinuloy ko kung ano ‘yung gusto kong gawin. Kasi, pinag-aral nila ako nu’ng college. Tapos, iniisip nila na ‘yun ang gagawin ko after college. Pero sabi ko kay Mama, ‘Ma, sorry. Gusto ko talagang maging drag queen.’ Tapos sabi niya, 'Ikaw ang bahala.'"

Family din ang sinabi ni Precious na gusto niyang makita sa front seat during their performance.

“'Yung kapatid ko po na nasa Bicol na lumabas na rin sa Drag Race, na na-expose na rin sa drag nang hindi niya inaasahan. And sana, ‘yung mga kapatid ko po, makauwi, dahil nasa abroad po sila. At saka si ano, si Direk Ice (na siya ring director ng concert).”

May ilang taon na rin pala nilang ginagawa ang pagiging drag queens at wala silang pinagsisihan na ito ang pinili nila dahil marami naman daw silang napapasaya sa kanilang mga performance.

And speaking of Ice, magkakaroon ng chance na mapanood ng mga taga-Cebu ang successful 35th anniversary concert niya sa Solaire last year. This time, sa The Waterfront Cebu City Hotel and Casino magpe-perform si Ice on February 18.

“Medyo may konting changes ang Becoming Ice sa Cebu. We may edit it a little bit because ‘yung show here (Solaire Hotel & Casino) ran for almost four hours. So, we don’t want that to happen again. Hahaha! Kasi nga, we have to pay for the overtime,” sabay tawa ni Ice.

Paliwanag ni Liza, “As the producer of the show, so siya, meron pong bago. Kasi we’re gonna bring instead of Chito Miranda, so, the Becoming Ice is really a narrative of Ice’s 35 years, pero sa mga segments nu’ng kanyang buhay, may iba’t ibang personalidad na talagang nakaimpluwensiya sa kanya."

Sa Cebu concert ni Ice, "We want to pay homage to one of the musicians na nakatrabaho rin ni Ice, Mike Villegas of Rizal Underground at mapi-feature siya with his song ‘Bilanggo,’" sabi pa ni Liza.

“And then, we still have Cookie Chua, Bayang Barrios. Of course, may special participation for this occasion po si Ms. Sylvia Sanchez. Meron silang duet," pagbubuking ni Liza.

Bukod sa Cebu, may next concert na si Ice sa Davao on March 25 at hopefully daw, sa Smart Araneta Coliseum sa September.

“So, babalik siya sa Manila on a bigger stage, on a bigger platform. At mas maraming gustong maki-celebrate at maki-close ng 35th years ni Ice.

“Actually, kausap namin si Vice Ganda. Hopefully, sabi ni Ice, nagkausap sila, for him to be part of the Araneta show on September. So, we’re all crossing our fingers na may makasama si Ice na mga bagong artists, bagong performers na influences his life in one way or the other.”

Bukod sa Cebu at Davao, dadalhin din daw ang Becoming Ice abroad.

“I think there are talks in Canada. Also, in Australia and hopefully also, Dubai and in the US. It will definitely a year-long celebration ng 35th anniversary ni Ice.

“Yes, kasi bumabawi. Sampung taon po siya na hindi nag-malaking concert. The last that he had was the 25th anniversary which is in Araneta as well. So I think, my husband deserves this year-long celebration,” proud na sabi ni Liza.