Watanabe at Ando, iuubos ang lakas sa Olympics

ni Gerard Arce - @Sports | July 27, 2021

Paniguradong ibubuhos ng todo ni four-time SEA Games gold medalist Kiyomi Watanabe ang kanyang lahat ng kaalaman at kahusayan sa pinagdaanang matinding training sa women’s under-63kgs half-middleweight category sa pakikipagharap kay two-time European Open silver medalist Cristina Cabana Perez ng Spain sa elimination round sa Nippon Budokan sa Tokyo, Japan.

Nakapuwesto sa Pool C ang 25-anyos na Filipina-Japanese na makakatapat sa unang laban ang 28-anyos na nagtapos sa 5th place sa Kazan Grand Slam nitong Mayo, 2021, gayundin ang power-house pool na kinabibilangan ni World No.2 at 2016 Rio Olympics gold medalist Tina Trstenjak ng Slovakia.

Tiwala si Philippine Judo Federation (PJF) President David Carter na ibibigay lahat ng dating Asian Youth Judo Champion ang kanyang makakaya upang makalusot sa mga bigating kalaban.

“In all her fights she will do her best. I told her to take it one step at a time. One match at a time. Focus in all the matches, do her best,” wika ni Carter sa panayam ng Bulgar Sports sa telepono, kung saan sinabi nitong mabigat ang mga makakatapat sa kanyang grupo. “Hard to say, all the pools are strong.”

Samantala, sasabak din ngayong Martes si Elreen Ando sa women’s weightlifting 64-kgs category, sa group A sa alas-6:50 ng gabi sa Tokyo International Forum.

Makikipagtagisan ang 22-anyos na Cebuana weightlifter sa mga pambato ng ibang bansa na sina Maude Charron ng Canada, Giorgia Bordignon ng Italy, Nuray Levent ng Turkey, Mitjan Marina de lara Cari Rodriguez ng Cuba, Chen Wen-Huei ng Chinese Taipei, Lisa Marie Schweizer ng Germany, Sarah Davies ng Great Britain at Angie Paola Palacios Dajomes ng Ecuador.