Warrant of arrest, inisyu ng Taguig court… Vhong Navarro, sumurender sa NBI

ni Lolet Abania | September 19, 2022

Sumuko ang television host at aktor na si Ferdinand “Vhong” Navarro sa National Bureau of Investigation (NBI) ngayong Lunes matapos mag-isyu ang Taguig court ng isang warrant of arrest laban sa kanya para sa kasong umano’y acts of lasciviousness, ayon sa lawyer nito.

Sa isang radio interview kay Atty. Alma Mallonga, sinabi nitong si Navarro ay mananatili sa ilalim ng kustodiya ng NBI hanggang ang kanyang recommended bail na P36,000 ay aprubahan.

“Gagawin natin ‘yung kailangan nating gawin. Mag-i-issue dito ng certificate of detention.

Si Mr. Navarro ay mapapasailalim ng custody ng NBI hanggang ma-approve ang kanyang bail,” sabi ni Mallonga habang tiwala siyang si Navarro ay papayagang makapag-bail ngayon ding araw.

Ayon kay Mallonga, ang warrant of arrest ay kaugnay sa isang insidente noong Enero 22, 2014, kung saan si Navarro ay malubhang nasugatan matapos na bugbugin ng isang grupo, na kabilang aniya dito ang model-stylist na si Deniece Cornejo at negosyanteng si Cedric Lee.

“Ito ‘yung basehan kung bakit merong serious illegal detention and grave coercion charges against Ms. Cornejo at Mr. Cedric Lee at iba pa. Siya (Vhong) ang biktima. Nu’ng nagsampa siya ng kaso biglang sinabi ni Cornejo na ni-rape pala siya. Hindi ito totoo,” saad ni Mallonga.

Noong Abril 2018, na-denied ng Department of Justice (DOJ) ang petition for review na inihain ni Cornejo, kung saan na-challenge o reto ang isang September 2017 resolution, dahil walang nakitang probable cause para magsampa ng kaso laban kay Navarro sa korte.

Giit pa ng DOJ, walang sapat na ebidensiya para i-warrant ang sakdal o indictment ni Navarro, anito, “it was ‘not impressed’ by Cornejo’s additional pieces of evidence: two previous rape complaints filed by two other women, a published statement of another, and an alleged date-rape drug.”

Gayunman, na-set aside ang DOJ resolution ng Court of Appeals (CA) noong Agosto 2022, habang iniutos nito sa City Prosecutor ng Taguig na mag-file ng rape at acts of lasciviousness charges laban kay Navarro.

Nagresulta naman ito sa Taguig City Prosecutor’s Office para maghain o mag-file ng isang rape case laban kay Navarro sa Taguig Regional Trial Court nito lamang buwan.