Walang lisensya, huwag mag-drive

@Editorial | Pebrero 17, 2024

Pinag-uusapan ngayon ang panukalang irehistro na ang electric vehicle at dapat ay lisensyado lamang ang magmamaneho nito.

Kapansin-pansin na lalong dumami ang gumagamit ng mga electric vehicle kaya tama lang na magkaroon na ng malinaw na regulasyon tulad sa ibang sasakyan.

Sa pulong ng Metropolitan Manila Development Authority (MMDA), Department of Transportation (DOTr), Land Transportation Office (LTO), Land Transportation Franchising and Regulatory Board (LTFRB) at Department of the Interior and Local Government (DILG), nais ng mga ahensya na magkaroon ng batas na ipatutupad at susundin sa paggamit ng e-tricycle, e-bike, e-pedicab, e-scooter at kuliglig.

Kailangan na ang mga patakaran, alituntunin at maging ang ordinansa ng mga lokal na pamahalaan ay pinag-isang regulasyon lamang para maiwasan ang kalituhan.

Sa pamamagitan din ng regulasyon, maiiwasan ang problema sa trapiko na kinasasangkutan ng mga e-vehicle lalo na ang aksidente.

Hindi maitatanggi na dahil nga sa walang malinaw na batas, kahit saan at kahit sino ay nakakapagmaneho na ng e-vehicle.

Panahon na para mapagtuunan ito ng pansin bago pa lumala ang sitwasyon.

Kailangang makiisa sa usaping ito, huwag pasaway dahil para rin ito sa kaligtasan ng lahat.

Sakaling makabuo na ng regulasyon, kapag sinabing bawal ang e-vehicle sa national road, sumunod, ‘pag iniutos na dapat lisensyado lang ang magda-drive, sumunod.

Walang problema kung lahat ay responsable at disiplinado.