Walang ‘K’ ang subdivision o condo na kumuha ng driver’s license para magpapasok

ni Atty. Persida Rueda-Acosta @Magtanong Kay Attorney | Enero 10, 2023

Dear Chief Acosta,

Dumalaw ako sa aking anak na nakatira sa condominium. Bago makapasok ay hiningi ng security guard ang aking driver’s license. Sinubukan kong magbigay ng ibang government-issued ID, ngunit ayaw niyang tanggapin sapagkat ang driver’s license lamang diumano ang ID na kanilang tinatanggap, alinsunod sa patakaran ng asosasyon ng mga condominium unit owners. Tama ba iyon? - Ralph

Dear Ralph,

Ang batas na sasaklaw tungkol sa iyong katangungan ay ang Republic Act (R. A.) No. 4136, o mas kilala bilang “Land Transportation and Traffic Code.” Nakasaad sa Section 19 ng nasabing batas na:

“Section 19. Duty to procure license. - Except as otherwise specifically provided in this Act, no person shall operate any motor vehicle without first procuring a license to drive a motor vehicle for the current year, nor while such license is delinquent, invalid, suspended or revoked.

The license shall be carried by the driver at all times when operating a motor vehicle, and shall be shown and/or surrendered for cause and upon demand to any person with authority under this Act to confiscate the same.” (Binigyang-diin)

Kaugnay nito, malinaw na nakasaad sa Section 12 ng Resolution No. 001, Series of 2017 ng Executive Committee ng Housing and Land Use Regulatory Board (now known as the Human Settlements Adjudication Commission [HSAC]) na:

“Section 12. Proscribed Acts. - It shall be prohibited:

12.1. To require the driver of any vehicle entering the subdivision or condominium to surrender his/her driver's license. The association is not authorized under the traffic laws to take custody, even on a temporary basis, the license issued by the Land Transportation Office. Xxx”

Alinsunod sa R. A. No. 4136, tanging ang mga personalidad na awtorisado lamang ang may kapangyarihan na kumuha ng driver’s license sa mga pagkakataong itinakda ng batas. Kaugnay nito, malinaw sa nabanggit na resolusyon ng Housing and Land Use Regulatory Board o HLURB (na ngayon ay kilala nang Human Settlements Adjudication Commission o HSAC), na ang pamunuan ng condominium, maging ang asosasyon ng mga condominium unit owners ay hindi maaaring manghingi ng driver’s license sa mga nagnanais pumasok sa kanilang condominium. Ang paghingi ng driver’s license mula sa taong nagmamaneho ng sasakyan, bilang kondisyon ng kanyang papasok sa subdivision o condominium ay mariing ipinagbabawal sapagkat ang asosasyon sa loob ng subdivision o condominium ay walang kapangyarihan sa ilalim ng batas, na kumuha, kahit pansamantala lamang, ng lisensya na ipinagkaloob ng Land Transportation Office o LTO sa sinumang tao.

Kaya naman, hindi tama ang sinabi sa iyo ng security guard sa condominium ng iyong anak. Kung totoo na polisiya iyon ng asosasyon ng mga condominium unit owners, maaari silang managot sa batas.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.