U.S. import Bierria, aagapay sa HD Spikers sa PVL Open

ni Gerard Arce - @Sports | September 20, 2022

Tinapik ng back-to-back third place finisher Cignal HD Spikers ang American opposite spiker na si Tai Bierria na malaki ang maitutulong upang tuparin ang kagustuhang matupad ang pagtuntong ng koponan sa championship round ng Premier Volleyball League (PVL) Reinforced Conference simula Oktubre 8.

Malaki ang kagustuhan ng HD Spikers na mahigitan ang dalawang sunod na bronze medal na inaasahang mapupunan ng 6-foot-1 spiker katulong ang mga power hitters na sina second best hitter Frances Molina, Jerrilli Malabanan, Angeli Araneta, Klarissa Abriam at team captain Rachel Ann Daquis.

Makakatulungan ng Amerikanang spiker ang 34-anyos na nabansagang “Queen Tamaraw” na outside at open hitter na si Daquis na tumatayong pinakabeterana sa koponang minamanduhan ni coach Shaq Delos Santos, na tinulungan ang HD Spikers na makuha ang third place finish sa nagdaang PVL Open at Invitational Conference.

Beterana ng maituturing ang 25-anyos na Georgia-native kasunod ng paglalaro sa ilang koponan kabilang ang pagpalo sa Memphis University noong 2016-2017, habang lumipat ito sa New Mexico University noong 2018-2020.

Nagpakitang-gilas din sa European volleyball sa Finland sa koponan ng Pölkky Kuusamo nitong 2020-2021 at huling beses naglaro sa Clamart Volleyball ng France. “Send your love to Tai Bierria, Cignal's reinforcement for the 2022 PVL Reinforced Conference!” ayon sa kanilang official Facebook page. “About last night... welcome to the Philippines, Tai!”

Bukod sa mga spikers ng koponan ay makakasama rin nito ang mga middle blockers na sina Marivic Meneses, Roselyn Doria, Maristela Layug, Claudine Troncoso, Jackie Acuna, liberos’ Fatima General at Angel Dionela, at setters Maria Estranero at Gel Cayuna.