Tropang Giga, swak sa 3rd semis, talsik ang Fuels

ni Clyde Mariano @Sports | March 23, 2023

Sinungkit ng Talk 'N Text Tropang Giga ang pangatlong semifinal spot at pinatalsik ang Phoenix Fuel Masters, 132-105, sa PBA Governors Cup sa Araneta Coliseum kahapon.

Hindi makakalas ang Tropang Giga sa mahigpit na bantay ng LPG Fuel Masters at kinuha ang panalo sa third quarter 100-83 sa likod ng 34-19 atake tungo sa panalo at tuluyang tapusin ang ambisyon ng Phoenix at ni rookie coach Jamike Jarin na ipilit ang sudden death game 2.

Sa panalo umabanse ang TNT sa semis at kasama ang maagang nagkuwalipika na San Miguel Beermen at defending champion Gin Kings.

Mainit na pinaglalabanan ng Meralco Bolts at Magnolia Hotshots ang huli at pang-apat na semifinal spot kung saan maglalaban ang apat na koponan sa best-of-five semis at ang dalawang mapalad na koponan ay maghaharap sa best-of-seven title showdown.

"Phoenix pushed us to the limit. My players refused to go down in the face of tremendous pressure and gallantly fought the enemy down the line. I praised them for their gallantry," sabi ni coach Jojo Lastimosa.

Pinangunahan ni Roger Pogoy ang balanseng opensiba ng TNT na kumolekta ng 25 points, Jayson Castro 20, Glenn Khobuntin 19, Rondae Hollis Jefferson 18, Calvin Oftana 15, at Mikey Williams 14.

Kinuha ni Pogoy ang scoring honor kay Jefferson at itinanghal ang Cebuano FIBA Asia at Asian Games veteran na best player of the game tungo sa next round.

Nakagawa si Da Vaughn Maxwell ng 23 points subalit hindi makakuha ng solidong suporta sa kanyang mga local teammates maliban kay Jayson Perkins at Jayvee Mocon na tumipa ng 21 at 15 points, ayon sa pagkakasunod. Napakalungkot ang sinapit ng Fuel Masters na lumaban sa simula at bumigay sa huli.