Tropang Giga at Road Warriors pipiliting umahon sa 3-0 lead

ni Clyde Mariano @Sports | February 1, 2023

Babasagin ng Talk ‘N Text at NLEX ang 2-0 lead na nag-uugnay sa kanila at sumosyo sa nagpapahingang undefeated solo leader Converge Fiberxers sa 3-0 sa PBA Governors Cup sa Philsports Arena sa Pasig City.

Nakatakdang magsagupa ng 5:45 p.m. matapos ang 3 p.m. na salpukan ng Blackwater Bossing (1-1) at San Miguel Beermen na (1-0) inaasahan magiging kapana-panabik ang labanan ng TNT at Road Warriors sa laro kapatid laban sa kapatid.

Dahil ang import ang susi sa panalo ng TNT at NLEX katuwang ang locals, inaasahang magpapakitang-gilas sina Jalen Hudson ng TNT at Jonathan Simmons ng NLEX na manalo at sumosyo sa Fiberxers.

Nakahandang umalalay kay Hudson ang deadly frontcourt trio nina Jayson Castro, Roger Pogoy at Filipino-Am Mikey Williams kasama sina John Paul Erram, Kib Montalbo at Glen Khobuntin.

Mas malawak ang karanasan ni Simmons na naglaro sa Orlando Magic, San Antonio Spurs at Philadelphia 76ers at naglaro sa Liaoning at Shanxi sa Chinese Basketball League kumpara kay Jalen Hudson na walang NBA credential maliban sa naglaro sa Germany at Greece.

Tutulungan sa opensiba si Simmons nina Kevin Alas, Don Trollano, Brandon Rosser, Jake Pascual at dating Rain or Shine Kris Rosales.

Sina TNT coach Jojo Lastimosa at NLEX mentor Frankie Lim kapwa dating PBA players ay kumpiyansa na mananalo ang kanilang koponan at panatilihin ang malinis na record at palakasin ang title quest sa Governors Cup hawak ng newly crowned Commissioner’s Cup champion Barangay Ginebra. “Beating NLEX is quite difficult because its import is an NBA veteran. We’ll play our best out there and hopefully my import play well offensively and defensively,” sabi ni Lastimosa.