Trabaho para sa 'pandemic graduates'

@Editorial | April 14, 2023

Problema pa rin ang employment ng fresh graduates o mga nagtapos nitong kasagsagan ng pandemya dulot ng COVID-19.

Ito ang isa sa mga isyu na dapat tutukan ng gobyerno at sa tulong na rin ng pribadong sektor.

Kaugnay nito, may mga mungkahi na magkaroon ng programa ang pamahalaan upang maitulay ang fresh graduates sa paghasa ng skills na hindi masyadong natutunan dahil sa online class.

Sa pamamagitan ng programa, may pagkakataon ang mga tinatawag na 'pandemic graduates' na maabot ang standard na hinahanap ng mga kumpanyang aaplayan.

Ayon sa datos, hirap makahanap ng trabaho ang mga fresh graduates dahil kulang sa soft skills at practical job skills na sana ay nahasa sa face-to-face classes.

May ilan ding naku-culture shock dahil iba ang expectation na itinuro noong nag-aaral pa lamang kumpara sa mismong pagtatrabaho, at ito ay nagpapakita lamang ng kakulangan sa kahandaang magtrabaho.

Kaya ang panawagan sa mga ahensya ng gobyerno na sumasakop sa usapin, mas tutukan ang problemang ito. Tulungan natin ang mga kabataan na maabot ang kanilang pangarap na makapasok sa trabaho na kanilang inaasam.

Bigyan natin sila ng pagkakataon na maging mas handa at may laban.