Trabaho para sa mga gumradweyt sa K-12 program, ‘di nakamit – DepEd

ni Lolet Abania | September 30, 2022

Ang direksyon ng K to 12 program na layon na makakuha ng trabaho o makapagtrabaho ang mga nagtapos nang estudyante ay hindi nangyayari sa ngayon, ayon sa Department of Education (DepEd), subalit patuloy ang ahensiya na nagsasagawa ng assessment kaugnay dito.

Ito ang naging pahayag ni DepEd spokesperson Michael Poa nang tanungin sa press conference ngayong Biyernes, kung ang DepEd ay ipagpapatuloy pa ang implementasyon ng Senior High School curriculum matapos ang kanilang pagre-review.

“Ang direksyon po kasi natin sa senior high schools is not itutuloy or hindi itutuloy,” saad ni Poa.

“Because ‘yung promise po ng K to 12 is that when our learners graduate after Grade 12 they are employable pero hindi po nangyayari ‘yan sa ngayon,” dagdag ni Poa.

Paliwanag ni Poa, ang direksyon ng Senior High School program ay maihanay o i-align ang mga itinuturong kasanayan o skills, lalo na sa technical at vocational track, batay na rin sa demand ng industriya nito.

Sinabi naman ni Poa na sisimulan ng DepEd na i-review ang Grade 11 at 12 curriculum sa Nobyembre ngayong taon.

Samantala, ang pagrepaso o pag-review sa curriculum para sa Kindergarten hanggang Grade 10 levels ay natapos na ng DepEd at sasailalim naman sa consultations hanggang Oktubre para sa kanilang assessment ng naturang programa.