Toyota Hilux, nabawi; 3 hinihinalang carnapper, huli sa Cebu

by BRT @News | October 5, 2026

Photo: PNP Cebu City Police Office

Nabawi ng mga pulis ang isang Toyota Hilux ilang oras matapos itong manakaw sa V. Rama Avenue, Barangay Guadalupe, Cebu City noong Biyernes, Oktubre 2.

Kasabay nito, tatlong hinihinalang carnapper ang sunod-sunod na nadakip matapos gamitin ng mga awtoridad ang CCTV footage, field verification at intelligence work para matunton ang kanilang kinaroroonan.

Unang nahuli ang isa sa Barangay Kamputhaw bandang alas-8 ng gabi. Sa kanyang impormasyon, natunton ng mga pulis ang Hilux na nakaparada sa compound ng isang simbahan.

Nasundan naman ang dalawang kasama nito. Nahuli ang isa sa labas ng isang fast-food chain sa General Maxilom Avenue, habang ang ikatlo ay naabutan sa isang guest house sa Barangay Capitol Site.

Narekober din ang susi ng Hilux, isang pulang Toyota Rush at iba pang ebidensya.

Patuloy ang imbestigasyon para malaman kung konektado ang tatlo sa mas malaking carnapper syndicate na kumikilos sa Central Visayas.