Towns at Tatum, nagdoble kayod sa T'wolves at Celtics

ni Anthony E. Servinio - @Sports | March 3, 2022

Naitakas ng Toronto Raptors ang 109-108 panalo sa Brooklyn Nets sa NBA kahapon sa ScotiaBank Arena na nagpapasok muli ng mga tagahanga matapos ang ilang buwan. Ito rin ang ikalawang sunod na wagi ng Raptors sa Nets sa nakalipas na 24 oras matapos ang 133-97 tambakan noong isang araw.

Tinabla ng three-points ni Seth Curry ang laban papasok sa huling 30 segundo, 103-103, subalit sinagot ito ng mahusay na depensa ni Gary Trent Jr. para sa 109-105. Nanguna si Trent na may 24 puntos at sinundan ni rookie Scottie Barnes na may 18 puntos abang 18 puntos din si Pascal Siakam. Gumawa ng 19 puntos si James Johnson para sa Nets na wala sina Kyrie Irving, Kevin Durant, Ben Simmons at Coach Steve Nash.

Nanaig si Three-Point champion Karl Anthony Towns at Minnesota Timberwolves sa bisitang Golden State Warriors, 129-114. Pumukol si Towns ng 39 puntos sa gitna ng personal na dwelo kay Stephen Curry na may 34 puntos lang.

Kumilos ang Boston Celtics sa fourth quarter at talunin ang Atlanta Hawks, 107-98.

Nagdoble ng trabaho si Jayson Tatum at nagtala ng 33 puntos matapos mapilayan sa bukong-bukong si Jaylen Brown tatlong minuto pa lang ang nakakalipas sa first quarter at hindi na bumalik.

Umulit ang LA Clippers sa Houston Rockets, 113-100, sa likod ng 22 puntos at 12 rebound ni Ivica Zubac. Nasayang ang 20 puntos ni kabayan Jalen Green at ipit pa rin ang Rockets sa pinakahuling pwesto sa Western Conference na 15-46.