Toni Gonzaga, dapat lang masibak!

ni Pablo Hernandez III - @Prangkahan | February 11, 2022

DAPAT LANG SIBAKIN SI TONI GONZAGA–May kumalat na balita na sinibak na ng ABS-CBN si Toni Gonzaga bilang host ng Pinoy Big Brother (PBB) kaugnay umano sa pagho-host nito sa proclamation rally ng BBM-Sara (Bongbong Marcos-Sara Duterte) sa Philippine Arena.

Kung si BBM lang ang ikinakampanya ni Toni ay wala namang problema dahil hindi naman Marcos ang nasa likod ng pag-reject sa prangkisa ng ABS-CBN, pero ang hindi kagandahan ay pati kandidatura ni Mayor Sara na anak ni P-Duterte ay ikinakampanya niya.

Kung totoong sibak na nilang main host sa PBB si Toni ay may dahilan ang ABS-CBN na gawin ito dahil libu-libong ordinaryong manggagawa ng Kapamilya network ang nawalan ng pagkakakitaan ng tatay ni Sara, tapos ikinakampanya pa niya? Pwe!

◘◘◘

PEKE ANG IPINAKITANG MALASAKIT NI TONI GONZAGA–Isa sa mga isyung pamba-bash na inabot ni Toni Gonzaga ay ‘yung peke ang ipinakita niyang malasakit sa mga taga-ABS-CBN na nawalan ng trabaho matapos i-reject ng Duterte gov’t. ang prangkisa ng network.

Ito ang post ni Toni Gonzaga noong July 18, 2020 sa kanyang social media account: “Sa lahat ng mga nasa posisyon ngayon, hindi namin makakalimutan ang ginawa n’yo sa mga trabahador ng ABS-CBN”.

Tapos ngayon, ‘yung anak ng nagpabasura sa prangkisa ng ABS-CBN ay iboto raw for vice-president, tsk-tsk-tsk!

◘◘◘

KALOKOHAN ANG SURVEY NG SWS–Naglabas na naman ng survey ang SWS na very good rating kay P-Duterte.

Isang uri ng panloloko sa taumbayan ang survey kasi mantakin n’yo, mahigit 3 milyong Pinoy ang tinamaan ng COVID-19, mahigit 54-K Pinoy na namatay, napakaraming nawalan ng hanapbuhay at naghihikahos ang pamumuhay sa panahon ng pandemya dahil sa kapabayaan ng Duterte gov’t., tapos very good ang rating ni P-Duterte? Buwisit!

◘◘◘

SINO KAYA ANG SUSUPORTAHAN NG MGA DDS KINA JINGGOY VS JV; RIA VS SANDRO?–Matapos iendorso ni vice-presidential candidate Sara Duterte ang kandidatura for senator ni ex-Sen. Jinggoy Estrada, inendorso naman ni P-Duterte ang kandidatura for senator ni ex-Sen. JV Ejercito.

Last year, matapos iendorso ni P-Duterte ang kandidatura ni re-electionist Rep. Ria Farinas ay inindorso ni Sara ang kandidatura ni Sandro Marcos (anak ni BBM) na katunggali ng congresswoman sa 1st district ng Ilocos Norte.

Kaya’t ang tanong: sino kaya kina Jinggoy, JV, Ria at Sandro ang susuportahan ng mga DDS?

Abangan!