Team Lebron, binokya uli ang Team Durant sa All-Star Game

ni Anthony E. Servinio - @Sports | February 22, 2022

Bumomba para sa hindi makakalimutang 50 puntos si Stephen Curry buhat sa 16 three-points at tinuldukan ni kapitan LeBron James ang nakakapanabik na 163-160 panalo ng Team LeBron sa Team Durant sa 2022 NBA All-Star Game kahapon sa Rocket Mortgage FieldHouse ng Cleveland, Ohio. Walang duda na hinirang si Curry na Kobe Bryant All-Star Most Valuable Player bilang dagdag sa dumaraming karangalan at nag-donate ang Team LeBron ng $450,000 (P23.148M) sa kawanggawa.

Sinuportahan si Curry ni Giannis Antetokounmpo na may 30 puntos habang 24 puntos si James at perpekto pa rin ang Team LeBron sa limang sunod na panalo simula 2018.

May 36 puntos lang sa Team Durant si Joel Embiid at sinundan ni Booker na may 20 puntos.

Panalo ang Team LeBron sa first quarter, 47-45, bumawi ang Team Durant sa 2nd quarter, 39-36. Tabla ang third, 45-45, kaya umabot ng $300,000 (P15.432M) ang donasyon ng Team Durant sa kawanggawa.

Sa halftime, bumaha ang mga alaala at emosyon at pinarangalan ang mga kasapi ng NBA 75th Anniversary Team. Isa-isang tinawag ang dumating na 45 sa nabubuhay na 61 sa 76 alamat. Unang tinawag ang mga forward na sina Charles Barkley, Carmelo Anthony, Dominique Wilkins, Bob Pettit, Rick Barry, Giannis, Elvin Hayes, Paul Pierce, Kevin Garnett, Jerry Lucas, Dirk Nowitzki, Billy Cunningham, Julius Erving, Kawhi Leonard, Kevin McHale, James Worthy, Dennis Rodman at LBJ at sinunod ang mga sentro Patrick Ewing, David Robinson, Bob McAdoo, Bill Walton, Hakeem Olajuwon, Robert Parish, Shaquille O’Neal at Kareem Abdul Jabbar. Huli ang mga gwardiyang sina Allen Iverson, Chris Paul, Reggie Miller, George Gervin, Dave Bing, James Harden, John Stockton, Damian Lillard, Clyde Drexler, Gary Payton, Jason Kidd, Oscar Robertson, Jerry West, Isiah Thomas, Ray Allen, Dwyane Wade, Curry, Magic Johnson at Michael Jordan.

Mga nakapuntos: TEAM LEBRON (163) – Curry 50, Antetokounmpo 30, James 24, Garland 13, Jokic 10, DeRozan 10, Allen 10, Doncic 8, VanVleet 6, Butler 2. TEAM DURANT (160) – Embiid 36, Booker 20, Ball 18, Murray 17, Young 13, LaVine 12, Wiggins 10, Towns 9, Tatum 8, Morant 6, Gobert 6, Middleton 5.