Tax records ni VP Sara, pinabubuksan na ni PBBM — BIR

ni Jeff Tumbado @News | July 31, 2026

Photo: Masusing sinasalansan ng Office of the Clerk of Court ng Senado ang mga financial at tax records nina Vice President Sara Duterte at Atty Mans Carpio matapos itong maisumite nang pormal ng Bureau of Internal Revenue (BIR) para sa pagbusisi sa impeachment hearings. (Jeff Tumbado)

Kinumpirma ng Bureau of Internal Revenue (BIR) nitong Huwebes na nakakuha na sila ng awtorisasyon mula kay Pangulong Ferdinand Marcos Jr. para maisumite sa Senate impeachment court ang tax records ni Vice President Sara Duterte.

Ayon sa BIR, nakuha nila ang pag-apruba ng Pangulo bago isinumite ang mga dokumento sa Office of the Clerk of Court, alinsunod sa itinakdang oras na alas-9 ng umaga na deadline ng impeachment court.

Nang tanungin ng mga mamamahayag kung may pahintulot ng Pangulo ang pagsusumite ng naturang mga rekord, simple nilang tugon ay, “Yes.”

Nauna nang inatasan ng impeachment court si BIR Commissioner Charlito Martin Mendoza na tumugon sa subpoena na humihiling ng tax records ni Duterte kaugnay sa alegasyon ng hindi maipaliwanag na yaman na nakapaloob sa ikalawang artikulo ng impeachment complaint.

Kasama sa mga isinumiteng dokumento ang tax records ni VP Sara, kanyang asawang si Atty. Mans Carpio, at ng iba pang mga negosyo na umano'y may kaugnayan sa mag-asawa.

Sa desisyon ng impeachment court noong Hulyo 20, binigyang-diin nito na ang paglalabas ng subpoena lamang ay hindi sapat na batayan upang isapubliko o isiwalat ang tax records ng isang taxpayer.

Ayon sa National Internal Revenue Code (NIRC), maaari lamang siyasatin o ilabas ang naturang mga rekord sa mga limitadong sitwasyon, kabilang ang may utos ng Pangulo, may kahilingan mula sa isang foreign tax authority na may pag-apruba ng Pangulo, o kung may pahintulot mismo ang taxpayer.