ni Mylene Alfonso @News | July 7, 2026
Photo: Senate PH
Ipinababalik ni impeachment court presiding officer Sen. Chiz Escudero sa Bureau of Internal Revenue (BIR) ang “green box” na naglalaman ng tax records ni Vice President Sara Duterte at ng kanyang mister na si Atty. Manases Carpio.
Wala pa aniyang legal na kautusan para ilipat sa kustodiya ng Senado ang kahon, at hindi pa rin ito pormal na iniaalok o namamarkahan bilang ebidensya sa impeachment trial.
ni Jeff Tumbado @News | June 11, 2026
Photo: File / BJMP
Naghain ang Bureau of Internal Revenue (BIR) ng reklamong tax evasion na nagkakahalaga ng P1 bilyon laban kay dating Bamban, Tarlac Mayor Alice Guo.
Sa ipinalabas na pahayag nitong Huwebes, pormal silang nagsampa ng kaso sa Department of Justice (DOJ).
Ayon sa BIR, nilabag ni Guo ang Section 254 ng National Internal Revenue Code (NIRC) of 1997, na tumutukoy sa pagtatangkang pag-iwas sa buwis, gayundin ang Section 255 na may kinalaman sa hindi paghahain ng tax returns at hindi pagbabayad ng tamang buwis.
Ayon sa mga rekord ng BIR, hindi umano naghain si Guo ng taunang income tax returns sa loob ng limang magkakasunod na taon sa kabila ng pagkakaroon ng malalaking gastusin, pagbili ng mga ari-arian, at iba pang transaksyong pinansyal sa nasabing panahon.
Gumamit ang ahensya ng tinatawag na “expenditure method” upang matukoy ang posibleng kita ni Guo.
Sa kasalukuyan, nakakulong si Guo sa Correctional Institution for Women sa Mandaluyong City mula pa noong Disyembre 2025 matapos siyang mahatulang guilty sa kasong qualified human trafficking.
ni Mylene Alfonso @News | April 15, 2026
Photo: FB / Bongbong Marcos / BIR
Pinalawig ni Pangulong Ferdinand Marcos, Jr. ng isang buwan ang deadline ng paghahain ng annual income tax returns (AITRs) hanggang Mayo 15, 2026.
“Pinalawig natin ang deadline ng filing ng 2025 Annual Income Tax Returns mula April 15 hanggang May 15, 2026,” wika ni Marcos sa kanyang social media post.
“Mas may oras ang bawat taxpayer na makapag-file nang maayos, kasama ang lahat ng kailangang dokumento, at walang ipapataw na penalties,” saad ng Pangulo.
Nabatid na ang mga indibidwal na kumikita lamang mula sa kompensasyon ay maaaring hindi na kailangang maghain kung kuwalipikado sila sa substituted filing, kung saan ang kanilang employer ang siyang maghahain ng buwis para sa kanila.
Gayunman, ang mga mixed-income earners, self-employed individuals, freelancers, at ang may higit sa isang employer ay dapat maghain ng sarili nilang Income Tax Returns (ITRs).
“Ginawa natin ito para mas magaan ang pagbabayad ng bawat Pilipino, lalo na sa panahong ramdam ang pagtaas ng presyo ng langis. Tuluy-tuloy ang ating ginagawa para maibsan ang bigat sa araw-araw na buhay ng ating mga kababayan,” ayon kay Marcos.
Dagdag pa niya, “Maaaring mag-file at magbayad sa pamamagitan ng BIR electronic platforms, o sa mga Authorized Agent Banks.”
Matatandaang noong Marso, inilunsad ng Bureau of Internal Revenue ang Electronic Tax (eTax) Filing o Tax Assistance Center sa BIR National Training Center Auditorium upang magbigay ng on-site support para sa electronic filing ng ITRs.
