ni Madel Moratillo | March 30, 2023
Nagpaalala ang Department of Labor and Employment sa mga employer hinggil sa tamang pasahod para sa kanilang mga empleyado sa mga holidays sa susunod na linggo.
Ayon sa DOLE, ang April 6, 7 at 10 ay deklaradong regular holiday. Kaya naman, kung ang isang empleyado ay hindi pumasok sa trabaho dapat pa rin nIyang matanggap ang 100 percent ng kanyang suweldo sa mga nasabing araw.
Kung pumasok naman ito sa mga nasabing araw, dapat siyang tumanggap ng 200 percent ng kanyang suweldo sa unang 8 oras, at dagdag na 30 percent sa sobrang oras ng trabaho.
Kung natapat sa dayoff pero pumasok pa rin, may dagdag pa siyang 30 percent na dapat matanggap at 30 percent pa kung sobra na sa 8 oras ang trabaho.
Para naman sa April 8 na deklaradong special non-working day, paiiralin ang no work, no pay policy malibang may colective baragaining agreement sa kumpanya.
Kung papasok ang empleyado dapat siyang tumanggap ng dagdag na 30% ng kanyang arawang suweldo sa unang 8 oras at dagdag pang 30 percent kapag sumobra rito.
Kung natapat naman sa dayoff, dapat siyang tumanggap ng dagdag na 50% sa unang 8 oras at dagdag na 30 percent kung sosobra rito.
Ayon sa DOLE, ang April 9 na Araw ng Kagitingan ay isang ordinary working day.