Bukod sa P85 na hinarang... P60 pa dagdag-sahod sa NCR — DOLE

ni Mai Ancheta @News | September 9, 2026

Photo: File

May panibagong dagdag-sahod para sa mga arawang manggagawa sa National Capital Region (NCR).

Ito ay matapos aprubahan ng Department of Labor  and Employment NCR Wage Board ang P60 dagdag-sahod sa mga minimum wage earners sa NCR sa pamamagitan ng Wage Order 28.

Bukod pa ito sa P85 na umento sa sahod sa ilalim ng Wage Order No. 27 na hindi pa naipatutupad matapos kuwestiyunin sa korte.

Ang P60 dagdag-sahod ay kinumpirma ni Labor Secretary Francis Tolentino sa kanyang pagdalo sa budget deliberation sa Kamara kaugnay sa tinatalakay na panukalang 2027 national budget.

Sinabi ni Tolentino na kailangang humanap ng paraan ang wage board upang matugunan ang pangangailangan ng mga manggagawa na patuloy na naghihintay sa kanilang umento sa sahod.

Ang Wage Order No. 28 ay inaprubahan ng wage board nitong Lunes, September 7, 2026.

Matatandaang naunsiyami ang implementasyon ng P85 na umento sa sahod nitong buwan ng Hulyo dahil kinuwestiyon ito ng ilang pribadong grupo sa korte.

Dalawang beses sana ibibigay ang umento sa sahod—P60 noong Hulyo at P25 sa Enero 2027, subalit hindi na naramdaman ng mga arawang manggagawa.

P85 taas-sahod, ipaglalaban ni PBBM

ni Mylene Alfonso @News | August 4, 2026

Photo: Hinarap mismo ni Department of Labor and Employment (DOLE) Secretary Francis Tolentino si Atty. Luke Espiritu, lider ng grupong Buklurang Manggagawang Pilipino (BMP) sa kalagitnaan ng kilos-protesta sa harap ng tanggapan sa Maynila kaugnay sa pagpapatigil ng Pasig RTC sa P85 umento o karagdagang suweldo. (Jeff Tumbado)

Idinepensa ng Malacañang ang implementasyon ng P85 dagdag-sahod para sa mga manggagawa sa National Capital Region (NCR) matapos harangin ng Temporary Restraining Order (TRO) ng korte ang pagpapatupad ng wage order.

Ayon kay Palace Press Officer Undersecretary Claire Castro, naghahanda na ang pamahalaan ng mga dokumento at pagtutol kaugnay ng naturang usapin, habang iginagalang pa rin aniya ang kapangyarihan ng korte.

“Sa ngayon po ay mayroon na pong ginagawa po na dokumento at pagtutol. Although of course iginagalang natin ang lahat ng korte, pero ang pamahalaan, ang administrasyon ay mayroon naman din pong karapatan na ihayag kung ano ang nararapat para sa ating mga kababayan at sa ating mga manggagawa,” ani Castro.

Aniya, sa pananaw ng pamahalaan, ang dapat na naging remedyo ng sinumang may pagtutol sa wage order ay ang paghahain ng apela sa Regional Tripartite Wages and Productivity Board (RTWPB) at hindi agad paglapit sa korte.

Ayon pa sa Palace official, handa ang Office of the Solicitor General (OSG) na ipaglaban ang wage order na naglalayong magbigay ng dagdag na kita sa mga manggagawa sa NCR.

“So, anyway, ang Office of the Solicitor General ay ready naman po na ipaglaban po ang wage order na naipasa po para sa ating mga manggagawa.”

Tinanong naman si Castro kung inaasahan ng Palasyo na maisasagawa na ang P85 wage increase matapos ang 20-araw na bisa ng TRO na matatapos umano sa Agosto 13.

Hindi umano siya maaaring magbigay ng katiyakan o manghula sa magiging susunod na hakbang ng korte at ng OSG.

Pinakamataas sa kasaysayan... Piso sadsad sa P60.10 vs. dolyar

ni Madel Moratillo @Business | March 20, 2025

Photo File / Circulated

Nagsara sa P60.10 ang palitan ng piso kontra US dollar kahapon. 

Sa palitan kahapon bumagsak sa P60.40 ang trading ng piso kontra dolyar mula nang magbukas ito sa P59.90. 

Sa pagsasara ng trading, umabot ito sa P60.10. Ito na ang pinakamataas na palitan ng piso kontra dolyar sa kasaysayan. 

Nabatid na sinusubukan na ng Bangko Sentral ng Pilipinas na mag-intervene sa foreign exchange market para suportahan ang piso at hindi na ito sana umabot sa P60 level.