Taduran asang sa 'Pinas ang title fight vs. Zhu

by Gerard Arce @Sports News | July 5, 2026

Umaasa si reigning International Boxing Federation (IBF) minimumweight champion Pedro “Kid Pedro Heneral” Taduran na gaganapin sa Pilipinas ang kanyang susunod na title fight na tinitingnang ipagtatanggol laban kay hard-hitting Chinese boxer DianXing Zhu ngayong taon matapos mawalang-saysay ang inaasam na laban kontra unified titlist Oscar “El Pupilo” Collazo ng Puerto Rico na tumakbo umano sa ibang dibisyon.

“Kahit saan po gawin ang laban, pero sana mas maganda kung dito na lang gawin sa Pilipinas,” pahayag ni Taduran  sa mensahe sa Bulgar Sports.

Wala pa mang pinal na petsa para sa naturang bakbakan, inihayag naman ni MP Promotions President Sean Gibbons sa The Ring Magazine na posibleng ganapin sa Setyembre o Oktubre ang naturang laban na itutulak umano sa Pilipinas, para sa ika-apat na title defense ni Taduran (20-4-1, 14KOs).

"We're in the middle of talking to Zhu's people, we're working to fight done for September or October in the Philippines. Any time he could have stepped up to the plate, unifications supersede a mandatory," eksplika ni Gibbons, na dismayado sa kinalabasan ng negosasyon sa mga promoters ni Collazo na tila umiiwas sa Pinoy knockout artist.

Nagawang umangat ni Collazo (15-0, 12KOs) sa flyweight division nitong nagdaang Hunyo 20 nang pabagsakin si Neider Valdez Aguilar sa second-round knockout para sa bakanteng World Boxing Organization (WBO) International flyweight title na ginanap sa California.