SUV, sumalpok sa poste ng kuryente…Vice mayor at konsehal ng Pitogo, Quezon, nadale

ni Lolet Abania | October 1, 2022

Isang vice mayor at isang konsehal ang nasugatan matapos na sumalpok ang kanilang sasakyan sa poste ng kuryente at pader ng bahay sa Pitogo, Quezon.

Batay sa report ng Pitogo Police, minamaneho ng 42-anyos na si Vice Mayor Paul Timothy Villaflor ang kanyang SUV habang sakay si Konsehal Alexander Mosquite, 43-anyos, kung saan patungo sila sa bayan ng Gumaca. Pagdating nila sa isang kurbadang kalsada sa Barangay Amontray, Pitogo, rito nawalan ng kontrol sa manibela ang vice mayor.

Unang sumalpok ang SUV sa poste ng kuryente saka ito bumangga sa pader ng isang bahay na nasa gilid naman ng highway.

Nagtamo ang dalawa ng mga sugat sa ulo at katawan.

Agad ding isinugod ng mga tauhan ng Municipal Disaster Risk Reduction and Management Office (MDRRMO) ng Pitogo ang mga biktima sa ospital sa Gumaca.

Sa imbestigasyon ng mga awtoridad, mabilis umano ang takbo ng SUV kaya nag-overshoot ito sa kurbadang bahagi ng kalsada na naging sanhi ng naturang insidente.