ni Lolet Abania | November 27, 2020
Itinaas na sa ikatlong alarma ang sunog sa isang residential area sa NIA Village, Bgy. Sauyo, Quezon City. Ayon sa mga residente, nakarinig sila ng malakas na pagputok ng kuryente saka mabilis na nagliyab ang apoy sa mga kabahayan.
Halos matupok ang mga bahay dahil sa dikit-dikit ito at gawa sa light materials.
Sa inisyal na ulat ng Bureau of Fire Protection (BFP) ng Quezon City, nagsimula ang sunog bandang alas-8 ng umaga ngayong Biyernes, at itinaas sa ikatlong alarma nang alas-8:23 ng umaga.
Gayundin, hirap makapasok ang mga trak ng BFP sa lugar dahil napakaliit ng daan at iskinita pa. Patuloy pa ang ginagawang pag-apula sa apoy ng mga bumbero.